Pastrohet deponia në Debërcë të Tetovës

Pas 15 vitesh, më në fund është larguar përfundimisht deponia e egër në hyrje të fshatit Debërcë. Kjo deponi krahas që ishte ilegale, poashtu shpesh herë ndizej dhe ishe burim i ndotjes së ambientit për banorët përreth. Ndonëse sipërfaqësisht është pastruar si deponi megjithatë sërish atje hidheshin mbeturina të ndryshme. Në vendngjarje ka dalur kryetari i Komunës së Zhelinës Blerim Sejdiu, i cili nënvizoi se kjo deponi daton që nga viti 2007 dhe vazhdimisht.

“Jemi këtu për të dhënë lajmin e madh se kjo deponi nuk ekziston më dhe se kemi pastruar të tërën dhe mund të themi se kjo tokë do të jetë në shfrytëzim nga pronari siç ka qenë në fillim para se të bëhet deponi. Me koncesionerin e ri kemi kontratë se nuk do të hidhet asnjë kamionetë me mbeturina në territor të komunës së Zhelinës. Të gjitha mbeturinat janë hedhur dhe do të vazhdojnë të hidhen në deponinë Rusino. Me këtë, Komuna e Zhelinës bëhet më e pastër, Komuna e Zhelinës me ne paraqet e dhe shënon një moment të suksesshëm dhe falënderoj banorët për mirëkuptimin dhe durimin që na kanë mbështetur deri më tani që ne të dalim të pastrojmë këtë deponi që ka qenë një ankth i vërtetë për ne”, deklaroi kryetari i Komunës së Zhelinës, Blerim Sejdiu.

Sejdiu ka sqaruar se është pritur 15 vite që të pastrohet kjo deponi për shkak të neglizhencës së pushtetit qendror.

“Ne kemi dëshmi se çdo vit kemi drejtuar kërkesa deri tek ministrat tanë shqiptarë që kanë udhëhequr me ministrinë e ambientit. Do të thotë prej momentit kur kemi ardhur në krye të komunës kemi dërguar shkresa dhe kemi konsideruar se ministria e Ekologjisë ka buxhet enkas për pastrimin e deponive dhe ne kemi përshkruar një specifikasion të qartë, kemi marrë informacione nga tereni dhe ia kemi bërë të qartë dhe të lehtë, ministra që kanë ardhur në vendngjarje, kanë premtuar para qytetarëve të Debërcës dhe nuk e kanë realizuar kurrë, edhe pse kanë pasur mundësi shumë herë. Ne nuk do të ndalemi aty, kemi marrë masat që të pasterojmë këtë deponi dhe ja sot është e pastër dhe pa mbeturina”, tha Blerim Sejdiu. Sipas tij, pastrimi i deponisë është bërë me mjete nga buxheti i komunës së Zhelinës. Ndërkaq, ai premtoi se nuk do të lejojë krijimin e deponive të reja dhe paralajmëroi dënime nëse hidhen mbeturina në vende publike për të gjithë. (koha.mk)