Mediumi malazez: Paratë për partitë pro-ruse dhe pro-serbe kanë ardhur përmes biznesmenëve të Vuçiqit

Një shumë e madhe parash hyri në Mal të Zi gjatë javëve të kaluara për financimin e zgjedhjeve lokale, për të cilat agjentët e Agjencisë së Sigurisë Kombëtare kanë zbardhur të dhëna të shumta, por menaxhmenti i ri i ANB-së nuk po përgjigjet.

Ata i lejojnë njerëzit e presidentit serb, Aleksandar Vuçiq të sjellin lirisht para për partitë pro-serbe dhe proruse dhe të blejnë zgjedhjet – paralajmërojnë burimet e Pobjedas nga ANB.

Shërbimi sekret malazez është sërish në duart e “rrjetit rus dhe serb”, pasi më 7 shtator kryeministri në largim, Dritan Abazoviq, shkarkoi ish-drejtorin e ANB-së, Sava Kentera.

Ai emëroi në krye të Agjencisë, Boris Bata Miliqin, dikur bashkëpunëtor shumë i ngushtë i drejtorit të mëparshëm – kuadrit pro-rus dhe pro-serb, Dejan Vukshiq.

Shkarkimi i Kenterës pasoi dy operacione ndërkombëtare në të cilat mori pjesë edhe shërbimi sekret malazez, njëri prej të cilëve ishte çmontimi i një rrjeti spiun rus. Pastaj disa diplomatë të dyshuar rusë u dëbuan nga Mali i Zi dhe u morën vendime për ndalimin e hyrjes në Mal të Zi për disa shtetas serbë.

Në listën e atyre që sipas vlerësimit të Agjencisë nuk mund të shkojnë në Mal të Zi është edhe pronari i televizionit Adria, Bratislav Stojiljkoviq, njeriu i cili ka kohë që qëndron në shtetin malazez dhe që dje është kthyer nga aeroporti i Tivatit.

Stojiljkoviq është një nga njerëzit kyç të presidentit serb, Aleksandar Vuçiq për aktivitetet rajonale, dhe së fundi ai është pronar i disa mediave në Mal të Zi, ndër të cilat është edhe televizioni Adria, dhe, sipas shërbimit inteligjent malazez, ai është një nga financuesit kryesor të Frontit Demokratik pro-rus dhe pro-serb.

Dje, portali M ka kujtuar se Stoiljkoviq së fundmi ka qëndruar në Amerikë së bashku me kryeministrin në largim, Dritan Abazoviq dhe ka marrë pjesë në një konferencë për media, ndonëse nuk është gazetar.

TV Adra e Stoiljkoviqit e favorizon maksimalisht Abazoviqin në emisione informative dhe speciale, jo vetëm përmes aktiviteteve të kryeministrit në mandatin e tij teknik, por edhe përmes aktiviteteve të URA-s së tij.

“Ditët e fundit Beogradi ka intensifikuar veprimet për të injektuar para për të blerë vota për zgjedhjet lokale në Mal të Zi. Ata sjellin para të mëdha. Paratë i sjellin biznesmenë që janë të lidhur me autoritetet në Serbi dhe ata kanë edhe biznese këtu”, thanë burimet e Pobjedas nga Agjencia e Sigurisë Kombëtare.

Televizioni Adria dje njoftoi se ndalimi i hyrjes në Mal të Zi për Bratislava Stoiljkoviq është vazhdimësi e persekutimit të “qytetarëve serbë të iniciuar nga ANB, derisa në krye ishte Savo Kentera”. /Telegrafi/