Paralajmërohen Skoda Citigo II dhe VW ‘up!’ (Foto)

Pas promovimit të versionit karavan të Superb të ri, kompania Skoda, përkatësisht Volkswagen, është duke u marrë me risi të tjera.

Përveç tri risive në segmentin SUV (Yeti i ri, Snowman/Polar dhe Baby Yeti/Fabia SUV), njëri nga modelet e reja të planifikuara është edhe modeli Citigo i gjeneratës së dytë.

Ky është edhe një model tjetër i ri prej modeleve tjera të reja, për të cilat ky prodhues ka planifikuar që shitjen globale ta fillojë në vitin 2018, transmeton Koha.net, kështu duke rritur prodhimin në 1.5 milionë vetura në vit (katër vjet pas kjo kompani pretendon të kaloj këtë limit në dy milionë vetura).

Edhe pasardhësi i Skodas së vogël aktuale përsëri do të jetë pjesë e familjes së veturave të vogla të qytetit (VW/Seat/Skoda), por kësaj here me ndryshime të mëdha në krahasim me të afërmin e VW-së.

Citigo II do të jetë pak më i madh në krahasim me modelin aktual, më i gjerë dhe me enterier më funksional, përmes teknologjive më të fundit, ndërsa çmimi nuk do të dallohet shumë nga modeli aktual.

Gjithashtu, në plan është edhe modeli elektrik i Citigo II, i cili me motor elektrik do të jetë me kapacitet prej 60 kuaj fuqi, shpejtësinë maksimale do ta arrijë deri në 200 kilometra në orë, si dhe do të kushtojë rreth 15 mijë euro.

Në anën tjetër, kompania Volkswagen ka vendosur që të zgjerojë familjen ‘up!’. Përveç modelit standard hatchback, up! do të duhej të jetë në dispozicion edhe si modeli i vogël SUV Cross up! (më i lartë por pa sistemin për tërheqje 4×4) dhe si modeli Space up!.

Sikurse Citigo i ri, ashtu edhe up! i ri do të ketë enterier më të gjerë me teknologjinë më të fundit, transmeton Koha.net, si dhe do të ketë në dispozicion edhe versionin hibrid.

up! i ri pritet të shfaqet në vitin 2020 dhe pritet të posedojë motorin 1.0-litër TSI me tre cilindra dhe me kapacitet prej 115 kuaj fuqi.