Paralajmërimi për Orban të Hungarisë: Durimit në Uashington “po i vije fundi”

Këshilltari amerikan për sigurinë kombëtare, Jake Sullivan ka thënë se ai dhe homologët e tij të NATO-s e paralajmëruan Hungarinë të mërkurën kundër vonesës së mëtejshme të anëtarësimit të Suedisë në aleancën ushtarake dhe ai paralajmëroi se durimit në Uashington “po i vije fundi”.

Reagimi i tij vjen pasi ligjvënësit nga partia e kryeministrit hungarez Viktor Orbán bojkotuan një seancë urgjente të parlamentit të hënën ku ishte planifikuar një votim për të vendosur për aplikimin e Suedisë për t’u bashkuar me NATO-n, përcjell Telegrafi.

Partia qeverisëse Fidesz, e cila mban një shumicë absolute në parlamentin e Hungarisë, ka bllokuar aplikimin e Suedisë që nga korriku 2022, duke pretenduar se politikanët suedezë kanë thënë “gënjeshtra të hapura” për gjendjen e demokracisë hungareze.

Partia këmbëngul që kryeministri i Suedisë duhet të vijë së pari në Hungari.

Lexo po ashtu Orbán dhe partia e tij bojkotojnë seancën e parlamentit hungarez, ku do të ratifikohet oferta suedeze për pranim në NATO

Suedia, së bashku me Finlandën fqinje, la mënjanë dekada të mosangazhimit ushtarak për të kërkuar mbrojtje nën ombrellën e sigurisë kolektive të NATO-s pasi Rusia nisi një pushtim të plotë të Ukrainës më 24 shkurt 2022.

Finlanda që atëherë i është bashkuar aleancës transatlantike. Vendi, së bashku me 30 aleatët e tjerë, duhet të pajtohen të gjithë që Suedia duhet të qëndrojë në radhët e NATO-s.

Hungaria është i vetmi anëtar që nuk po e bën një gjë të tillë.

Sullivan tha se ai nuk do të “qëndronte këtu sot dhe të bënte kërcënime të veçanta, apo spekulime për hapat që do të hidhnim, por sigurisht që edhe durimi ynë për këtë nuk mund të jetë i pakufishëm”.

Lexo po ashtu Nëse dorëzohet Ukraina, ne do të kërkojmë Zakarpattian – thotë lideri i partisë hungareze të ekstremit të djathtë

Ai tha se SHBA-ja “do të vazhdojë ta shikojë me kujdes, por shpreson se do të ketë një zgjidhje konstruktive për këtë çështje në një afat shumë të afërt”.

Ndryshe, Orbán, i cili ka pasur një qëndrim miqësor ndaj Kremlinit ndaj luftës së Rusisë në Ukrainë, ka thënë se ai ftoi kryeministrin suedez Ulf Kristersson në Budapest për të diskutuar “bashkëpunimin e ardhshëm në fushën e sigurisë dhe mbrojtjes si aleatë dhe partnerë”.

Nëse nuk thirret një seancë tjetër urgjente e parlamentit të Hungarisë për të debatuar për aplikimin e Suedisë, asambleja do të mbahet në seancën e rregullt më 26 shkurt. /Telegrafi/