Me para nga Japonia do të blihet automjet i ri për ndihmën e shpejtë për spitalin e Tetovës

Japonia do të jep si donacion automjet të ri për ndihmën e shpejtë për Spitalin Klinik të Tetovës. Marrëveshja e grantit është nënshkruar nga ambasadorja e Japonisë në Maqedoninë e Veriut Keiko Haneda, drejtori i Spitalit Klinik të Tetovës Florim Besimi dhe kryetarja e Komunës së Tetovës, Teuta Arifi.

Ambasadorja japoneze theksoi se të dy vendet janë miq tashmë 25 vjet, pas vendosjes së marrëdhënieve diplomatike, përcjell Telegrafi Maqedoni.

“Deri tani Japonia ka ndarë 5 grante për Komunën e Tetovës për institucionet mjekësore dhe shkollat. Në të njëjtën kohë, ky do të jetë granti i 10 që Japonia e nënshkruan me Maqedoninë e Veriut. Me zbatimin e tij do të përmirësohen shërbimet mjekësore për qytetarët e të gjithë rajonit”, tha Keiko Haneda.

Ndërsa kryetarja e Tetovës Teuta Arifi, tha se me atë që Japonia para tre viteve vendosi që të hapë ambasadë në Shkup dhe të ketë ambasador rezident, tregon për atë se sa i madh është respekti i Japonisë dhe mbështetja që e jep.

Ndryshe, ambasadorja japoneze gjatë qëndrimit në Tetovë e vizitoi edhe Xhaminë e Larme./Telegrafi/