Pandemia COVID-19, kompanitë dhe punëtorët e sektorit të turizmit në Shqipëri nuk e dinë se çfarë do të ndodhë me ta

Pandemia COVID-19 thuajse i ka boshatisur plazhet e Durrësit edhe pse është një fundjavë e ngrohtë tetori.

Turizmi po kalon periudhën e tij më të vështirë, ndonëse në përshtatjen me këtë realitet të ri është mbështetur gjerësisht nga turizmi patriotik i rajonit.

”Ky sezon vërtet ka qenë sfidë e madhe për të gjithë hotelerinë shqiptare, jo vetëm bregdetin në Durrësit. Kjo situatë u parapri dhe nga tërmeti që ndikoi jashtëzakonisht shumë në hoteleri dhe planifikimet e pushuesve, pasi u bë një zonë e pasigurt. Më pas edhe pandemia COVID-19 ndikoi shumë. Sezoni turistik nuk e ka pasur fluksin e viteve të mëparshme, pasi ne nuk mbahemi vetëm nga klientela shqiptare, po dhe nga turistët e huaj. Për fat ne kemi pasur fat që kemi mbështetur njëri-tjetrin në këtë situatë. Kemi pasur vendas dhe shumë nga rajoni, Kosova dhe Maqedonia e Veriut, po të ardhurat nuk janë të ngjashme me ato që mund të sillnin turistët e huaj në Shqipëri”, tha Esma Peca, menaxhere hoteli në bregdet.

Përballë këtij realiteti të ri dhe pandemisë që nuk dihet sa do të zgjasë, operatorët ndjehen të pasigurt për ecurinë e sezonit të ardhshëm.

Të cenuar janë dhe punëtorët e këtij sektori.

“Jemi përballë një situate pasigurie. Në të tillë situatë nuk mund të bësh planifikim për të ardhmen pasi nuk e dimë as çfarë do të ndodhë, as se si do të organizohemi. Sfida më e madhe është sigurimi i personelit. I mban gjatë sezonit dhe në fund të tij duhet t’i thuash gjithçka mbaroi. Vitet e tjera sezoni ka qenë më i gjatë dhe kishim mundësi ta mbanim stafin. Na është dashur ta shkurtojmë në 70 për qind të stafit”, tha ajo.

Në këto kushte, hotelet e shumta në bregdetin e Durrësit nuk kanë mundur të mbyllin kontrata të sigurta me tur operatorët për sezonin e ardhshëm, siç ndodhte rëndom çdo vjeshtë.

”Na është dashur të lidhim vetëm kontrata jo me garanci pasi kështu janë kërkuar. Më parë hotelet e mëdha lidhnin kontrata me garanci, përmes parapagimit duke siguruar klientët në hotel. Tani lidhim kontratë për mbajtje dhomash por nuk ka asnjë siguri që turistët do të vijnë. Kjo pengon sektorin e turizmit në të gjithë Shqipërinë”, përfundoi Peca. /TCH/