“Panama Papers”, Ngjela: Berishës po i ngushtohet laku

Pas publikimit të skandalit të ashtuquajtur “Panama Papers”, ku disa nga lider botërorë akuzohen se kanë fshehur paratë në parajsën fiskale të Panamasë, në Shqipëri i është kushtuar vëmendje e madhe.

Në publikimet paraprake thuhet se nga Shqipëria janë të përfshirë disa kompani dhe aksionerë.

Spartak Ngjela, ish deputet i Partisë Demokratike, është shprehur se Berisha është i lidhur me skandalin e firmës GFI Technologies, ku kjo kompani ka përfituar koncesionin e markimit të naftës nga qeveria Berisha.

“Në fakt skandali i sapo zbuluar i firmës GFI Technologies, që rezulton nga Panama Papers, në lidhje me koncensionin që i ka dhënë Berisha pas humbjes së zgjedhjeve, e ka strukur Saliun në bodrumet e marrëzisë së tij, kurse deputetet, po shkojnë në Parlament nesër. Po Saliu do të shkojë? Nëse shkon, a do të flasë? Me siguri, nëse flet, do të gënjejë me nivelin gënjeshtar të një adoleshenti. Prandaj nesër, ose nuk do të dëgjoni gjë, ose do të dëgjoni gënjeshtra dhe akuza infantile. Por, se mos është hera e parë! Jo, por këtë herë është në hapat e fundit”, shkruan Ngjela.

Ai ka hedhur akuza ndaj Prokurorisë së Përgjithshme, ku sipas Ngjelës, ajo do të hetojë vetëm për të mbuluar përfshirjen e Berishës në këtë skandal.

“E kuptoni që hajduti Sali është një 14 vjeçar që vidhte gjatë natës, dhe ditën identifikonte si hajdutë kundërshtarët e tij? E kuptoni se me këtë njeri që i ka bërë të gjitha, Shqipëria ka kaluar një gjëmë të vërtetë? Me të vrarë, me të fyer, të poshtëruar nga një njeri që ka qenë dhe mbetet të jetë turpi ynë kombëtar. Ka ardhur fundi. Shqiptarët duhet të jenë të vëmendshëm, se deri tani i kanë lënë të varfër dhe pa atdhe. Po vjen koha që t’u kthehet “atdheu i grabitur” nga vjedhësit që i kanë “qeverisur”, dhe të fillojnë edhe ata jetën normale në Shqipërinë e tyre”, përfundon Ngjela.