Pallotta: Roma nuk pati zgjidhje tjetër në rastet e shitjes së Pjanicit dhe Salahut

Presidenti i Romës, Jim Pallotta, ka reaguar ndaj kritikave që e quajnë klubin italian një “supermarket” duke thënë se nuk ka pasur zgjidhje tjetër në rastet e shitjeve të Miralem Pjanic dhe Mohamed Salah.

Giallorossët kanë tendencë që t’i shesin lojtarët kryesor thuajse çdo verë, ndërsa së fundmi i larguan mesfushorin boshnjak (2016, te Juventusi) dhe anësorin egjiptian (2017, te Liverpooli).

“Ka frustrime nga ana ime kur njerëzit thonë se Roma është një supermarket… Kur ta mendosh, Pjanic kishte një klauzolë dhe duhej të shkonte”.

Lexo po ashtu Të gjitha lajmet për ROMËN

“Salah është duke e copëtuar Ligën Premier, ai tha se donte të largohej dhe nuk kishte më kohë në kontratën e tij, prandaj nuk kishim zgjidhje”.

“Janë disa gjëra që ndodhin prapa skenave, të cilat njerëzit nuk i kuptojnë, se lojtarët e tyre duan të largohen ose janë disa gjëra që duan t’i bëjnë. Ne nuk përpiqemi vetëm të shesim lojtarë”, ka deklaruar Pallotta për radion Sirius XM.

Në prillin e kaluar, Roma e angazhoi ish-drejtorin sportiv të Sevillas, Monchi, i cili është duke e transformuar strategjinë e transferimeve të Giallorossëve.

“I mori pak kohë derisa u përshtat, sepse siç e dimë të gjithë, nuk është lehtë të vish te Roma, pasi ka aq shumë media (që bëjnë presion), prandaj ishte shumë ndryshe për te”, ka shtuar kreu i klubit italian. /Telegrafi/