Osmani: Thaçi e ka mbështetur Shpend Ahmetin

Deputetja e Lidhjes Demokratike të Kosovës, Vjosa Osmani në një intervistë në RTV 21, tha se lideri I partisë së saj, Isa Mustafa ka garuar i vetëm në Prishtinë, pasi sipas saj Partia Demokratike e Kosovës i ka dhënë mbështetje kandidatit të Vetëvendosjes, Shpend Ahmeti.

“Kjo mund të konfirmohet në raundin e dytë, në votat e qytetarëve në ‘Kodrën e Trimave’, që kryeministri Thaçi dhe anëtarë tjerë të Partisë Demokratike të Kosovës e kanë mbështetur Shpend Ahmetin”, tha Osmani.

Osmani poashtu la të nënkuptohet se edhe mund të bashkëpunojë në qeverisjen komunale, por që ende nuk mund ta thotë me një siguri të plotë këtë gjë.

“Natyrisht që LDK-ja është parti bashkëpunuese, asambelistët e LDK-së do të këmbëngulin që projektet e filluara nga Isa Mustafa të vazhdojnë, por që akoma nuk mund të dalim me ndonjë qëndrim konkret”, tha Osmani.

Ajo poashtu tha se do të kërkojnë llogari për premtimet, siç i ka quajtur, “megalomane” të Shpend Ahmetit, “pasi ai duhet të jap përgjegjësi për secilin premtim të dhënë”.

Ndihmën për Shpend Ahmetin në garën e balotazit të dielen e ka konfirmuar edhe vetë Sekretari i Partisë Demokratike të Kosovës – Dega në Prishtinë, Bujar Cakolli, duke thënë se ka qenë ai dhe PDK që kanë ndikuar që Shpendi të jetë fitues.

Cakolli ka thënë për media se, pa mesazhet e tij, dërguar miqve nëpërmjet të cilave ka kërkuar votën për Shpendin, Vetëvendosje vështirë se do ta merrte Prishtinën. /Telegrafi/