Osmani priti në takim zyrtaren e SHBA-së: Me përfshirjen e grave në proceset e paqes dhe sigurisë, rriten shanset për paqe të qëndrueshme

Presidentja e Republikës së Kosovës, Vjosa Osmani ka pritur sot në takim zyrtaren e lartë të Sekretarit të Shtetit në Zyrën për Çështje Globale të Grave (S/GWI), Katrina Fotovat.

Në takim me Fotovat, presidentja Osmani ka theksuar se Forumi për Gratë, Paqen dhe Sigurinë me temë “Ndërtimi i Aleancave për Paqe të Qëndrueshme”, po organizohet për herë të parë dhe përbën një nga zotimet në kuadër të Samitit për Demokraci.

Sipas Osmanit, Forumi është ngjarja e parë e përmasave të tilla me pjesëmarrës nga 6 kontinente.

Gratë e Republikës së Kosovës, sipas presidentes Osmani e kuptojnë shumë mirë rëndësinë e kësaj Agjende.

Ajo po ashtu tha se gratë e Kosovës janë shembulli në i mirë i angazhimit rreth kësaj agjende.

Sipas Osmanit, ato shquhen posaçërisht për angazhimin aktiv drejt lehtësimit dhe ballafaqimit me pasojat e luftës dhe drejtësinë tranzicionale. Tutje, presidentja ka veçuar punën e Komisionit Qeveritar për njohjen dhe verifikimin e statusit të personave të dhunuar gjatë luftës. Sipas presidentes edhe gratë nga shoqëria civile kanë ndihmuar, gjithashtu të mbijetuarat e dhunës seksuale.

Osmani ka shfaqur bindjen se me përfshirjen e grave në proceset e paqes dhe sigurisë, rriten shanset për paqe të qëndrueshme.

Sipas njoftimit të Presidencës, palët janë dakorduar për bashkëpunim dhe koordinim të rregullt drejt realizimit të projekteve të përbashkëta drejt avancimit dhe zbatimit të Agjendës GPS. /Telegrafi/