Opozita kërkon interpelancë me Edi Ramën dhe mocion për rritjen e çmimeve

Nëntë deputetë të grupit të Komisionit të Rithemelimit të Partisë Demokratike, njohur ndryshe si mbështetës të Ish-Kryeministrit Sali Berisha, kanë bërë kërkesë për mbajtjen e një interpelance parlamentare me Kryeministrin Edi Rama për rritjen e çmimeve.

Kërkesa është firmosur nga Edi Paloka, Flamur Noka, Belind Këlliçi dhe 6 deputetë të tjerë dhe kërkohet të diskutohet mbi paketën e masave, rezervat e shtetit dhe rezervat e naftës në veçanti.

Pak orë më pas, kreu i grupit parlamentar të PD-së, Enkelejd Alibeaj ka depozituar një kërkesë për mocion.

Në kërkesën e grupit të PD-së, thuhet se duhet shqyrtuar me urgjencë marrja e masave dhe ndaj sipas nenit 98 të rregullores së Kuvendit, kërkohet mocion për debat dhe në përfundim, mund të propozohet miratimin i masave të veçanta.

Rritja e çmimeve, sidomos e çmimit të naftës, ka sjellë protesta të vazhdueshme në Tiranë dhe qytete të tjera të vendit.

Sot në orën 17:00 pritet të mbahet dita e shtatë e protestës para Kryeministrisë.

Kryeministri Rama ka marrë disa masa përfshirë indeksimin e pensioneve, naftë pa taksa për fermerët, ulje taksash për pagat si dhe kompensim të rritjes së çmimit për produktet e shportës.

Për shkak të protestave, qeveria u detyrua që të krijonte bord për karburantin, që përcakton periodikisht çmimin e naftës, ku nga 260 lekë për litër që ishte kur nisën protestat, sot nafta shitet me 211 lekë [1.69 euro] për litër. /Telegrafi/