Opozita ende pa datë për protestën

Shtyrja  e protestës së 26 marsit, si duket ka qenë njëri nga sinjalet kryesore se kanë filluar çarjet serioze brenda opozitës së bashkuar. Këto çarje kanë bërë që opozita të mos ketë ende një datë se ku do t’i organizojë protestat e radhës.

Zëdhënësi i Lëvizjes Vetëvendosje (VV), Frashër Krasniqi, ka theksuar për Telegrafin se subjektet opozitare fillimisht janë duke diskutuar për të arritur konsolidim më të madh në mes vete.

Ai ka thënë se subjektet opozitare fillimisht janë duke diskutuar për të arritur një konsolidim më të madh në mes vete, që do të mundësohej sipas tij, në saje të sqarimit të zhvillimeve të fundit brenda opozitës.

“Ne si Vetëvendosje jemi që para çdo veprimi të përbashkët të krijojmë fillimisht një Alternativë qytetare, në të cilën përfshihet edhe shoqëria civile. Kjo do ta bënte kundërshtimin ndaj qeverisë më të fuqishëm dhe më masiv”, ka thënë Krasniqi.

Ai ka theksuar se që protesta do të ketë shumë shpejt, duke shtuar se “për këtë pritet të vendoset ndërkohë”.

Në anën tjetër, zëdhënësi i Aleancës për Ardhmërinë e Kosovës (AAK), Muharrem Nitaj, ka thënë për Telegrafin se diskutime në lidhje me protestën janë duke u bërë, por sipas tij, nuk ka asgjë konkrete për datën se kur do të mbahen ato.

Ndryshe, ndonëse partneri opozitar VV-ja i ka vendosur vijat e kuqe me PDK-në, lideri i AAK-së, Ramush Haradinaj, në një intervistë për media ka thënë se partia e tij do të bashkëpunonte edhe PDK-në, por që sipas tij, nëse këta të fundit garantojnë se nuk e vazhdojnë mentalitetin e vjetër qeverisës. /Telegrafi//