Operacioni te Mali i Jezercës, shpëtohen 5 turistë – gjendet edhe trupi i pajetë i kroates

Pas një sërë përpjekjesh prej disa orësh, policia shqiptare ka arritur të shpëtojë 5 turistë, të cilët kishin mbetur të bllokuar në Majën e Jezercës.

Lajmi është bërë i ditur nga ministri i Brendshëm, Taulant Balla.

Fatkeqësisht, një prej turistëve ka humbur jetën, si pasojë e rënies në greminë.

Forcat operacionale në terren kanë  mundur të nxjerrin nga vendi ku kishte rënë edhe trupin e pajetë të turistes që humbi jetën.

Lexo po ashtu Nxirret trupi i pajetë i kroates që humbi jetën në Majën e Jezercës - ende të bllokuar alpinistë të tjerë

“Prej disa orësh, Policia e Shtetit në bashkëpunim me Shërbimin e Urgjencës, Forcat e Armatosura  dhe Repartin e Kërkim-Shpëtim të Republikës së Kosovës u përfshinë në një operacion të vështirë në malin e Jezercës, për t’i dhënë ndihmë një grupi aplinistësh që kishin hyrë nga territori i Malit të Zi dhe kishin mbetur të bllokuar në majën e Jezercës. Gjatë operacionit të kërkim-shpëtimit është bërë e mundur nxjerrja e trupit të pajetë i një shtetasje, e cila kishte humbur jetën si pasojë e rrëshqitjes në një zonë të thepisur dhe me borë.”, informon Balla.

Pesë nga alpinistët kroatë të asistuar nga Shërbimi i Kërkim-Shpëtimit Malor të Kosovës, po kthehen tek e mjetet e tyre, në territorin e Malit të Zi. Dy turistë të tjerë u transportuan me ndihmën e helikopterit në qytetin e Bajram-Currit.