Operacioni policor “Guri”, arrestohen gjashtë persona të dyshuar dhe sekuestrohen mbi 12 kg marihuanë

Policia e Kosovës, Drejtoria për Hetimin e Trafikimit me Narkotikë, ka vazhduar zbatimit të operacionit policor të realizuar më herët gjatë këtij viti (30 mars, 5 prill e 4 maj). Nga ky operacion janë arrestuar gjashtë persona të dyshuar dhe sekuestruar mbi 12 kg marihuanë.

“Sot, më 12.05.2023, në vazhdën e zhvillimit të operacionit policor ‘Guri’, i zhvilluar në koordinim me organet e drejtësisë (prokurorinë), janë kontrolluar 11 lokacione, ku si provë materiale janë gjetur dhe konfiskuar rreth 12 kg substancë narkotike (dyshohet të jetë marihuanë), 3467 euro, 12.700 lekë (paratë dyshohet janë përfituara nga vepra penale) dhe tri vetura me të cilat është bërë bartja e lëndës narkotike”, njofton Policia e Kosovës.

Policia thotë se gjatë kontrolleve, në njërin nga lokacionet, një i dyshuar, në tentim për të ikur ka kërcyer nga një lartësi e shtëpisë dhe ka pësuar lëndime.

I njëjti është dërguar për tretman mjekësor.

“Në tri operacionet e më hershme dhe në këtë të ditës së sotme janë konfiskuar rreth 48 kg substancë, dyshohet të jetë e llojit marihuanë vlera e të cilës është rreth 70 mijë euro, janë arrestuar nëntë të dyshuar të cilët dyshohet se kanë vepruar si grup kriminal që është marrë me ‘blerja, posedimi, shpërndarja dhe shitja e paautorizuar e narkotikeve, substancave psikotrope dhe analoge’”, njofton tutje Policia e Kosovës.

Gjatë zbatimit të operacionit më herët, ishin gjetur e konfiskuar rreth 36 kg marihuanë dhe ishin arrestuar tre të dyshuar./Telegrafi/