Botë Nga Bota

OKB-ja do të votojë mbi rezolutën që e “ringjall” ofertën e Palestinës për anëtarësim, Rusia “nën ethe” se edhe Kosova po shkon drejt asaj rruge

Para 10 muajve

Asambleja e Përgjithshme e OKB-së do të votojë mbi një rezolutë që do t’i jap Palestinës “të drejta dhe privilegje” të reja dhe do t’i bëjë thirrje Këshillit të Sigurimit ta rishqyrtojë kërkesën e saj për t’u bërë anëtarja e 194 e Kombeve të Bashkuara.

Sipas Kartës së OKB-së, anëtarët e mundshëm duhet të jenë “paqedashës” dhe Këshilli i Sigurimit duhet të rekomandojë pranimin e tyre në Asamblenë e Përgjithshme për një miratim përfundimtar.

Bëhet e ditur se Palestina u bë shtet vëzhgues jo-anëtar i OKB-së në vitin 2022.

“Ne kemi qenë shumë të qartë që nga fillimi se ka një proces për marrjen e anëtarësisë së plotë në Kombet e Bashkuara. Ne kemi thënë që në fillim mënyra më e mirë për të siguruar anëtarësimin e plotë të Palestinës në OKB është ta bëjmë këtë përmes negociatave me Izraelin. Ky mbetet qëndrimi ynë”, tha zëvendës ambasadori amerikan, Robert Wood, duke theksuar veton që SHBA-ja e vendosi ndaj një rezolute që do t’i hapte rrugë Palestinës për anëtarësim.

Ndryshe nga Këshilli i Sigurimit, në Asamblenë e Përgjithshme prej 193 anëtarësh nuk ka veto dhe rezoluta pritet të miratohet me shumicë të madhe, sipas diplomatëve perëndimorë.

Rezoluta “përcakton” se një shtet i Palestinës është i kualifikuar për anëtarësim, shkruan Associated Press, përcjell Telegrafi.

Por, drafti origjinal i saj thuhet të jetë ndryshuar shumë.

Siç raportohet, drafti i parë do t’i kishte dhënë Palestinës “të drejtat dhe privilegjet e nevojshme për të siguruar pjesëmarrjen e saj të plotë dhe efektive” në seancat e asamblesë dhe konferencat e OKB-së, të barabarta me shtetet anëtare.

Ndërsa drafti përfundimtar hedh poshtë gjuhën që do ta vendoste Palestinën “në pozitë të barabartë me shtetet anëtare”.

Ai shton gjithashtu një dispozitë ku thuhet në mënyrë kategorike: “Shteti i Palestinës, në cilësinë e tij si shtet vëzhgues, nuk ka të drejtë të votojë në Asamblenë e Përgjithshme apo të paraqesë kandidaturën e tij për Organet e Kombeve të Bashkuara.”

Pra, lista përfundimtare e të drejtave dhe privilegjeve në draft përfshin të drejtën për të folur për të gjitha çështjet jo vetëm për ato që lidhen me palestinezët dhe Lindjen e Mesme, të drejtën për të propozuar pika të rendit të ditës dhe për t’u përgjigjur në debate dhe të drejtën për t’u zgjedhur si zyrtarë në komisionet kryesore të kuvendit, por heq “të drejtën e tyre për të votuar”.

Sipas diplomatëve, Rusia dhe Kina janë të shqetësuara se dhënia e të drejtave për Palestinën do t’i hap rrugë edhe anëtarëve të tjerë të mundshëm të OKB-së, me Rusinë që shqetësohet për Kosovën dhe Kina për Tajvanin.

Ndryshe, presidenti palestinez Mahmoud Abbas dorëzoi për herë të parë kërkesën e Autoritetit Palestinez për anëtarësim në OKB në vitin 2011. Ai dështoi sepse palestinezët nuk morën mbështetjen minimale të kërkuar nga nëntë nga 15 anëtarët e Këshillit të Sigurimit. /Telegrafi/