Oferta e PS për Elbasanin: Metalurgjiku kthehet në park kombëtar, gara e F1 brenda 2030

Rivitalizimi i Kalasë, zhvillimi i Metalurgjikut dhe Automotoparku është oferta e mazhorancës qeverisëse për qytetarët e Elbasanit në zgjedhjet e 11 majit.

Kryeministri Rama prezantoi personalisht idenë për transformimin e Metalurgjikut në një park industrial.

“Qëllimi është të hyjmë në një fazë të re në transformimin e kombinatit apo, më saktë, territorit të Kombinatit Metalurgjik. Ky park duhet të jetë një destinacion për të gjithë dhe, së bashku me Automotoparkun, duhet të bëhet pika që do të bashkojë Tiranën dhe Elbasanin, duke e bërë Elbasanin pjesë të metropolit të Shqipërisë në dekadat e ardhshme”, tha Rama.

Përveç përfshirjes së shtetit në këtë plan zhvillimi, nëpërmjet Korporatës Shqiptare të Investimeve, Kryeministri Rama kërkoi që parku të jetë një mundësi investimi për të gjithë.

“Korporata Shqiptare e Investimeve, AIC, do të jetë pjesë e këtij projekti, sepse patjetër që për gjithçka që u prezantua këtu në mënyrë shumë të përgjithshme, do të jetë shumë e rëndësishme që edhe pala shtetërore, përmes instrumenteve të veta, të jetë e pranishme dhe të planifikojë edhe pjesën e vet të investimeve”, tha Rama.

Ministri për Pushtetin Vendor, njëkohësisht edhe drejtuesi politik i Elbasanit, shpjegoi objektivin për Parkun Metalurgjik. “Edhe pse është në fazën e përgatitjes së terrenit, qeveria premton se brenda vitit 2030 në Automotoparkun e Elbasanit do të mbahet gara e F1”, tha Arbjan Mazniku, Ministër i Shtetit për Pushtetin Vendor.

“Një tjetër projekt, përmes të cilit qeveria synon të ndikojë në zhvillimin e Elbasanit, është ai i Automotoparkut, që, përveçse një cirkuit garash, do të shërbejë edhe si qendër trajnimi për sigurinë rrugore”, shtoi Rama