Nxënësit shqiptarë, shumë pak të interesuar për maqedonishten

Filloristët shqiptarë nuk shfaqin interesim për të mësuar lëndën e maqedonishtes, edhe pse nga klasa e katërt kjo lëndë është obliguese. Mësimdhënësit thonë se për këtë mos interesim kanë ndikuar shumë faktor, madje edhe politika e zhvilluar viteve të fundit. Mësuesja Enisa Abdullai, si arsye tjetër përmend edhe problemet në plan-program. Sipas saj ajo që s’ka kuptim është se fillimisht mësohen tekstet e pastaj shkronjat.

“Plan programet me të vërtet kanë qenë të vështira sidomos duke e llogaritur se fillojnë prej klasës së katërt. Më herët fillimi i maqedonishtes ka qenë prej në klasë të tretë edhe mendoj që duhet të kthehet ajo reformë. Neve fokusin e kemi vënë më tepër të gjuhët tjera se sa tek maqedonishtja. Kanë vështirësi, sidomos në klasë të gjashtë kur vijnë. Ato ilustrimet definitivisht mungojnë, librat janë shumë të thatë, janë tekstet, poezitë jepen, realisht nëse unë nuk ua përkthej ata nuk kanë gjasa ti kuptojnë – deklaroi Enisa Abdullai, mësuese e gj. Maqedonase.

“Besoj që është e vështirë më shumë se gjuhët tjera. Pse ndoshta fillon më vonë, për shembull anglishten e dimë më shumë se maqedonishten. Nëpër librat e maqedonishtes më shumë ka tregime, tekste se vizatime dhe kjo është problem për ne që ta kuptojmë më mire”, u shpreh Blerta Tahiri, nxënëse.

“Për shembull, në gjuhë angleze ka fotografi dhe tregon përafërsisht për çka bëhet fjale edhe pa u mundu me lexuar e kuptojmë nga ana e fotografive. Kurse në gjuhën maqedonase kemi mungesë të fotografive. Ka më shumë tekste, poezi dhe gramatikë”, tha Enisa Osmani, nxënëse.

Për shkak të ankesave të shumta për plan-programet e kësaj gjuhe, Byroja për Zhvillimin e Arsimit ka nisur aktivitete me mësimdhënësit për ndryshimin e plan-programeve ekzistuese.