Nuk u pranua kërkesa për largimin e Atiqit nga pozita e kryetarit të Mitrovicës së Veriut, asamblisti thotë se vështirë që mblidhen nënshkrimet

Komuna e Mitrovicës së Veriut nuk e ka pranuar kërkesën e qytetarëve për iniciativën e largimit të kryetarit, Erden Atiq. Kjo pasi sipas Kryesuesit të Kuvendit të kësaj komune, iniciuesit nuk kanë bërë kërkesën në bazë të Udhëzimit Administrativ të hartuar nga Ministria e Pushtetit Lokal.

Pasi në shtator u hartua një udhëzim administrativ për largimin e kryetarëve të komunave ndërmjet peticionit, të parët që përdorën atë ishin disa serbë për katër komunat veriore.

Por, deri më tani nuk kanë arritur synimin e tyre.

Kërkesa atyre u është refuzuar për largimin e kryetarit të Mitrovicës së Veriut, Erden Atiq.

Kryesuesi i Kuvendit të kësaj komune Nedzad Ugljanin tregon se ku u bë gabimi në këtë iniciativë.

“Grupi iniciues nuk është bazuar në Udhëzimin administrativ dhe vet kërkesa është në mënyrë jo adekuate e shkruar sepse aty ka paqartësi. Të parin hap gabim që kanë bërë është që nuk kanë njoftuar kryesuesin për formimin e grupit iniciues”, tha Nedzad Ugljanin – Kryesues i Kuvendit, Mitrovicë e Veriut.

Lexo po ashtu Komuna e Mitrovicës Veriore nuk e pranon si të bazuar kërkesën për shkarkim të kryetarit, Erden Atiq

Ugljanin pret që iniciativa të ndërmerret përsëri ndonëse, sipas tij gjithçka është politike, madje edhe gabimet në kërkesë.

Të hapur për fillimin e një procedure të tillë përsëri janë edhe asamblistët, ndonëse Betim Osmani beson se e kanë të vështirë të mblidhen nënshkrimet e nevojshme.

“Procedurat të gjithë e dimë si shkojnë, për më e i jep mundësi çfarëdo grupi me i përdorë edhe ata mundësitë e veta. Është procedurë e gjatë kjo, nëse ata munden me i mbledhë 5-6 mijë apo 10 mijë nënshkrime që me mbajt referendumin për ta shkarku kryetarin ne si asamble duhet të ia mundësojmë”, tha Betim Osmani – asamblist në Mitrovicën Veriore.

Për tri komunat tjera veriore, televizioni ka tentuar të marrë vesh nëse janë pranuar kërkesat apo jo, por nuk ka pasur konfirmime nga ana zyrtarëve komunalë./TV Dukagjini/