Nuk pati kuorum për vendimmarrje, Kuvendi nuk voton për raportin vjetor të RTK-së

Për shkak se nuk pati kuorum për vendimmarrje, Kuvendi i Kosovës nuk arriti të marr vendim në lidhje me propozimin e Komisionit për Administratë Publike, Pushtet Lokal, Media dhe Zhvillim Rajonal, për votim kundër raportit vjetor të punës së Radiotelevizionit të Kosovës.

“Për shkak që nuk ka kuorum për vendimmarrje, vazhdojmë me pikën tjetër të rendit të ditës”, tha nënkryetarja e Kuvendit të Kosovës, Saranda Bogujevci.

Në lidhje me këtë raporti, deputeti Hajdar Beqa i PDK-së tha se po kërkohet nga Komisioni që të votohet kundër, vetëm me qëllimin që të shkarkohet Bordi i RTK-së

“Unë konsideroj se pika për të cilën po folët, dëshiroj të jetë e sinqertë, por mendoj që është më shumë te pika 10 për shkarkimin e Bordit. Krejt qëllimi është që të bëhet shkarkimi në mënyrë që të bëhet emërimi i disa personave të afërt me pushtetin”, tha Hajdar Beqa i PDK-së.

Të njëjtin mendim me Beqën, në emër të Aleancës për Ardhmërinë e Kosovës, e dha edhe Time Kadrijaj.

“Vet fakti që pika e nëntë e rendit të ditës e kemi shkarkimin e këtij bordi të RTK-së jep të kuptoj që këtu po kemi politizim dhe deklarimi rreth raportit është të arsyetojë shkarkimin që ju keni vendosur ta bëni pak më vonë. Ky shkarkim i bordeve dhe ngarkim siç keni deklaruar ju se kemi me bë depolitizimin e bordeve faktikisht në emër të ç‘kapjes së shtetit ju po e kapni shtetin”, tha jo.

Gjatë shqyrtimit të raportit, Doarsa Kica Xhelili kryetare e Komisionit për Administratë Publike, vlerësoi se i njëjti nuk i përmbushë obligimet ligjore, dhe kështu ka rekomanduar që mos të miratohet nga kuvendi.

“Mendoj se duhet të bëjmë një pyetje thelbësore, çfarë duhet të presim ne nga ky raport? Çka duhet të presim nga ky transmetues publik në raportim? Kompetencë, strategji, vizion, reforma, apo aktivitet. Po ashtu adresim për mos shtrirje territoriale të sinjalit. Tutje, e kemi edhe çështjen Raportit të progresit të Komisionit Evropian për Kosovë, pasi që nga viti në vit po i përsërit dilemat e njëjta lidhur me këtë transportues publik. Pra, a kemi nga këto diçka nga në raport, asgjë”, tha ajo.

Ndërsa, kryetari i Komisionit për Buxhet, Punë dhe Transfere, Armend Muja theksoi se ky komision është kundër këtij raporti, pasi sipas tij ka shpërputhje midis raportit të shpenzimeve dhe projeksionit buxhetor.

“E dyta, është sa i përket shpenzimeve, zakonisht para alokimit të buxhetit, RTK-ja dërgon një projeksion financiar mbi bazën e projeksionit financiar, Kuvendi i Kosovës i bën alokimin e mjeteve. Gjatë raportimit vjetor ka një shpërputhje midis raportit të shpenzimeve dhe projeksionit fillestar dhe nuk ka asnjë evidencë që është informuar Kuvendi për këtë punë. Në bazë të Ligjit, bordi i RTK-së e ka për obligim mos të lejojë tejkalimin e shpenzimeve. Ndërsa, edhe në vitin 2020 ekziston një tendencë e çuditshme e tejkalimit të shpenzimeve pa pasur autorizim”, theksoi ai. /Telegrafi/