Norvegjia, anëtare e NATO-s, do të vazhdojë të furnizojë me karburant anijet e marinës amerikane, tha të dielën ministri i Mbrojtjes i Norvegjisë, pas një thirrjeje nga një furnizues privat i karburantit detar për të ndaluar këtë në përgjigje të prishjes së dukshme në marrëdhëniet SHBA-Ukrainë.
“Ne kemi parë raporte që ngrenë shqetësime për mbështetjen për anijet e marinës amerikane në Norvegji. Kjo nuk është në përputhje me politikën e qeverisë norvegjeze”, tha në një deklaratë ministri norvegjez i Mbrojtjes, Tore Sandvik.
“Forcat amerikane do të vazhdojnë të marrin furnizimin dhe mbështetjen që kërkojnë nga Norvegjia”, shtoi ai, transmeton Telegrafi.
Sandvik lëshoi deklaratën e tij pasi furnizuesi norvegjez i karburantit Haltbakk Bunkers, tha se do të ndalonte furnizimin me anije të marinës amerikane në përgjigje të mënyrës sesi u trajtua presidenti ukrainas Volodymyr Zelensky në Shtëpinë e Bardhë të premten.
“Merita e madhe për presidentin e Ukrainës që u përmbajt dhe ruajti qetësinë edhe pse SHBA-ja bëri një shfaqje televizive. Na sëmuri… Pa karburant për amerikanët”, tha kompania në një postim tashmë të fshirë në Facebook.
Drejtori ekzekutiv i Haltbakk Bunkers, Gunnar Gran, konfirmoi për gazetën norvegjeze VG se kompania mori një vendim për të mos furnizuar ushtrinë amerikane, por tha se masa do të kishte një ndikim “simbolik” pasi nuk kishte një kontratë fikse. /Telegrafi/