Një shkollë në Gjakovë ndërpret grevën

Fokusi i emisionit të sotëm në Debat Plus të RTV Dukagjini i takoi dy protagonistëve të takimit të sotëm, Kurtit dhe Jasharit të cilët zhvilluan një takim mëngjesin e së martës, takim ky i cili nuk arriti rezultat në përfundimin e grevës.

Përgjatë këtij debati, në mesin e mendimeve të të ftuarve pati një lidhje telefonike direkte nga drejtoresha e shkollës në Gjakovë e cila bëri të ditur se shkolla “Këlmend Rizvanolli” do të fillojë mësimin që nesër (e mërkurë).

“Shkolla jonë ka vendosur që nesër të fillojë mësimi në shkollën tonë, arsyeja ka qenë sepse nuk kemi mundur të marrim ndonjë informatë të mirë nga takimi i sotëm, sepse konsiderojmë që këtë gjë nuk e kemi bërë për asgjë tjetër përpos për të mirën e nxënëseve”, ka deklaruar drejtoresha e cila ka theksuar se informatat nga takimi i sotëm  në mes Kurtit dhe Jasharit i kanë marrur përmes mediave.

Ndërkaq, drejtoresha Kamishi-Zeka nuk ka dashur të deklarohet nëse janë të kënaqur me atë çka Kurti po i ofron sektorit publik e që janë 50 euro në kuadër të pakos për përballimin e inflacionit.

Njëherësh, shkolla e lartëcekur ka postuar një njoftim në faqen e saj në  Facebook duke shkruar se “me qëllimin e vetëm dhe për të mirën e nxënësve, Këshilli i Mësueseve të Sh.F.”Kelmend Rizvanolli”, ka vendosur që ditën e merkurë, me datë 14.9.2022 të filloj mësimin e rregullt”.