Një muaj paraburgim për të pandehurit që prodhonin armë dhe mjete plasëse në mënyrë të paautorizuar

Gjykata Themelore në Prishtinë ka caktuar masën e paraburgimit prej një muaji për të pandehurit F.H, B.S dhe S.S për shkak të dyshimit të bazuar se kanë kryer veprën penale, Importimi, eksportimi, furnizimi, transportimi, prodhimi, këmbimi, ndërmjetësimi ose shitja e paautorizuar e armëve apo mjeteve plasëse.

Në njoftimin për media thuhet se nga neni 372 par. 2 lidhur me par. 1 të KPRK-së dhe kundër të pandehurve B.S dhe S.S për shkak të dyshimit të bazuar se kanë kryer veprat penale Tregtia e ndaluar nga neni 305 dhe Prodhimi dhe shpërndarja e produkteve të dëmshme mjekësore nga neni 266 lidhur me nenin 31 të KPRK – së.

“I pandehuri F.H në kundërshtim të ligjit të zbatueshëm në lidhje me armët apo materialet plasëse dyshohet se ka furnizuar, transportuar, ndërmjetësuar ose shitur armë dhe revole të tipit “Glock” dhe të tipit “Sik – suver” si dhe një sasi të municionit prej 750 copë, ndërsa të pandehurit B.S dhe S.S pas marrëveshjes paraprake, në intervalin kohor që nga muaji dhjetor të vitit 2018, në qytetin e Prishtinës kishin vënë në qarkullim barërat ose produktet mjekësore pa u bërë kontrolli i nevojshëm nga personi apo enti i autorizuar, gjithashtu të njëjtit pa autorizim kishin shitur, blerë dhe kishin bërë shkëmbimin e barërave dhe produkteve mjekësore”, thuhet në njoftim.

Po ashtu sipas njoftimit gjykata ka konstatuar se lidhur me kërkesën e Prokurorisë Themelore në Prishtinë është caktuar masa së paraburgimit kundër të pandehurve F.H, B.S dhe S.S pasi që të njëjtit dyshohen për vepër të rëndë penale.

“Po të gjenden në liri ekziston rreziku i ikjes me qëllim të shmangies nga përgjegjësia penale dhe në këtë mënyrë do të pengonte rrjedhën e procedurës penale”, thuhet në njoftim./Telegrafi/