Gjithmonë e dinte se çfarë donte. Atë që krijon është e ndryshme dhe e dallueshme. Kreacionet e saj janë vazhdimësi e një dimensioni ku rëndësi ka e bukura dhe jo prej nga vjen ajo
E guximshme, unike, e veçantë dhe e ndryshme – pikërisht kështu mund ta përshkruajmë dizajneren e modës dhe të kostumeve, Orhidea Berisha. Ajo veçohet për guximin dhe vlerat artistike që transmeton dhe përfaqëson, ndërsa synimi i saj është të ndryshojë me hapa të vegjël ndërgjegjësimin për kulturën e veshjeve.
Orhidea qysh në rini ka fantazuar për këtë punë dhe ka shprehur prirje për të kombinuar veshjet në përgjithësi. Ajo studioi për modën, sot dizajnon veshje të femrave dhe meshkujve, gjithmonë duke ruajtur një linjë të fortë krijuese dhe artistike.
Paraqitja në skenën e modës la të kuptohej një karrierë e ndritur përpara saj. Si stiliste, krijon trende dhe të imponon konceptin e tërheqjes vizuale. Ndërkohë pati shumë projekte dhe bashkëpunime që sollën eksperiencë dhe kujtime, duke i dhënë formë gjithçkaje që është sot.
Marka “ORCHIDÉE”, të cilën kreatorja e ndërtoi me kujdes, sot përfaqëson më shumë sesa thjesht veshje. Ky brend është një manifestim i një filozofie të jetesës – një ekuilibër delikat midis qëndrueshmërisë, elegancës dhe trendëve bashkëkohorë.
Shtëpia e saj e modës dallohet për linjat e pastra, minimalizmin, por edhe detajet e guximshme, ndërsa evolucioni i markës pasoi transformimin e saj personal dhe profesional.
Orhidea këmbëngul për magjepsjen e sofistikuar dhe të rafinuar, me origjinalitet freskues, dizajn imagjinativ dhe kombinime të pazakonta, falë të cilave ajo ra në sy të njohësve të rreptë të modës dhe artistëve të njohur këtu dhe jashtë vendit të cilët kanë gjetur frymëzimin dhe shprehjen e karakterit të tyre në mënyrë autentike përmes kreacioneve të saj.
Ne biseduam me krijuesen për kompleksitetin e punës së saj, frymëzimin dhe modën në përgjithësi.
Kur e kuptuat pasionin tuaj për modën dhe a ishte e lehtë apo e vështirë rruga për të realizuar ëndrrat tuaja të modës?
Unë nuk e ndjek modën në kuptimin tradicional për të ditur se cilat tendenca janë aktuale dhe çfarë është në modë këtë sezon. Unë thjesht ndjek zërin tim të brendshëm. Kështu janë bërë fustanet e mia. Dhe si i qasem punës është saktësisht e njëjtë me atë se si i qasem jetës ndryshe, me sa më pak dramë dhe sa më shumë argëtim. Sepse kur e do atë që bën, nuk lodhesh kurrë. Pra, receta është: bëje gjithmonë atë që e bën zemrën tuaj të lumtur, bëre atë me përkushtim dhe disiplinë dhe argëtohu sa më shumë gjatë rrugës. Mendoj se është çështje perceptimi. Unë kurrë nuk ankohem tepër për periudha të vështira, sepse e di që edhe rrugët e gabuara janë ato të duhurat. Ato periudha janë atje për një arsye, për të na mësuar diçka. Para së gjithash, ato sjellin mësime dhe mësimet janë gjithmonë të dobishme për ne. Dhe, sa i përket dashurisë për stilin dhe veshjen, këtë e zbulova shumë herët. Isha me fat që prindërit më përkrahën në të gjitha eksperimentet e mundshme, kështu që relativisht shpejt dola me stilin tim, i cili u formua aq shumë sa tani mund të stilizoj edhe femra të tjera.
Sot, emri juaj është sinonim i krijimeve glamuroze dhe elegante, por historia juaj e modës filloi larg nga shkëlqimi. Si dukeshin aventurat tuaja të para të modës?
Më shumë se çdo gjë, fillimet e mia ishin një udhëtim për të gjetur veten. Çdo veshje ishte një hap drejt identitetit tim si krijuese, dhe çdo hap më afroi me pasionin tim. Gjithçka ishte e lidhur me një dëshirë për të sjellë ndryshim. Familja ime kishte traditë në qepje dhe unë ndihmoja në punët e tyre. Këto përvoja më ndihmuan të kuptoj teknikën dhe rëndësinë e detajeve në çdo krijim. Takimet me artistë të tjerë dhe dizajnerë më frymëzuan të krijoja. Bashkëpunimi me ta më dha guximin të përqafoja ide të reja dhe të eksploroja stile të ndryshme, kjo periudhë më ndihmoi të formoj një stil të veçantë dhe të kuptoj se si mund të shprehja personalitetin tim përmes modës.
Përveç atyre që veshin krijimet tuaja, sa ndikon energjia femërore që ju rrethon te ju, në punën tuaj, në krijimtarinë tuaj?
Unë, jam rritur me modën. Edhe si fëmijë më ka bërë shumë përshtypje ajo atmosferë krijuese në punë dhe gjithçka që ndodh aty. Që në moshë të re mora informacione të mira se si duket një mjedis i shëndetshëm biznesi dhe se si një ditë pune mund të jetë produktive, por edhe e mbushur me të qeshura dhe shaka. Nëna ime është mbikëqyrësja ime e parë për gjithçka. Në momentin kur krijohet diçka, nëse nuk e marr atë reagimin wow, atëherë kam bërë diçka të gabuar. Kam besim të plotë në mendimin dhe në punën e saj.
Përveç studimeve dhe dashurisë për modën, a keni ndonjë interes tjetër, pasion apo gjëra që bëni kur nuk jeni duke punuar?
Përveç studimeve dhe dashurisë për modën, kam një interes të madh për udhëtimet. Më pëlqen të eksploroj kultura të reja dhe të provoj kuzhina të ndryshme. Aktivitetet fizike janë gjithashtu shumë të rëndësishme për mua. Më pëlqen të qëndroj aktive dhe shpesh merrem me sport, si vrapimi apo palestra. Këto aktivitete më ndihmojnë të ruaj energjinë dhe ta përballoj më mirë stresin.
Si ia arrin të krijosh një gardërobë që është në të njëjtën kohë e rastësishme, komode dhe që mund të kombinohet me veshje të shumta, a është sekreti në një qasje minimaliste?
Dëshira ime është që vetë prerja e veshjes të duket minimaliste dhe të ndërtoni në fakt “gardërobën tuaj të qëndrueshme” me këtë koleksion. Unë krijoj veshje që kombinohen mirë me njëra-tjetrën, por edhe theksojnë siluetën tuaj si individ. Një nga veçoritë e të gjithë veshjeve është funksionaliteti i tyre, që nëpërmjet prerjeve dhe aksesorëve të ndryshëm mund t’i poziciononi në trup në mënyra të ndryshme dhe t’i vishni nga mëngjesi në mbrëmje. Me këtë dua t’i jap klientit një dozë të eksperimentit që kaloj gjatë krijimit të pjesëve të veshjeve.
Çfarë ju tërhoqi në profesionin e disenjatores së modës dhe vendosët ta bëni atë profesionin e jetës suaj?
E thënë shkurt – kreativiteti. Më pëlqen më shumë procesi që bëj me duart e mia. Në shumë segmente të punës përpiqem të kombinoj krijime të ndryshme për të marrë rezultatin më të mirë. Ky është një profesion sfidues, krijues dhe emocionues.
A shihni një pasqyrim të vetes në veshjet që krijoni?
Po, e shoh. Vetëm kështu mund të krijoj. Unë gjithmonë e nis nga vetja. Unë nuk mund të krijoj diçka që nuk është reflektimi im. Çdo krijues, çfarëdo arti që praktikon, e derdh botën e tij të brendshme në atë që bën. Kjo është arsyeja pse është interesante të vëzhgosh diversitetin te njerëzit. Kur kjo kuptohet, nuk ka më kurrë frikë nëse do të jesh e mirë apo jo. Ju do të jeni ajo që jeni në atë moment dhe kur të përfshini veten në krijimin tuaj, do të shfaqet diçka që është një reflektim juaji atëherë.
Na duket se moda dhe në fakt kultura e veshjeve shpesh shikohen shumë sipërfaqësisht. Cila është rëndësia e veshjes për ju?
Mendoj se zgjedhja e veshjeve nuk është asnjëherë e rastësishme, edhe kur i qasemi asaj zgjedhjeje pa kujdes apo thjesht funksionalisht. Çdo veprim i veshjes apo i modës është gjithashtu një akt dekorimi – trupi, por edhe vetëdija jonë për të, dhe nënkupton ndërtimin e identitetit. Unë gjithmonë them se moda në thelb ka vetëm dy funksione: të zbulojë ose fshehë identitetet tona dhe kjo për mua është rëndësia e saj më e madhe, sepse ajo mund të jetë sa diskriminuese aq edhe gjithëpërfshirëse.
“Veshja nuk e bën njeriun”. Megjithatë, a është kjo gjithmonë e vërtetë? Apo ne në fakt komunikojmë me rroba pa e kuptuar fare?
Ne komunikojmë gjithmonë me veshje, është si të thuash një lëkurë e dytë, një pasqyrim i identitetit tonë ndaj botës. Ne e bëjmë këtë në mënyrë të pandërgjegjshme dhe të vetëdijshme, por ne gjithmonë komunikojmë. Diskriminimi, paragjykimi, supozimi i identitetit të dikujt, madje edhe forma të ndryshme të dhunës racore, seksuale ose gjinore shpesh shkaktohen nga përfaqësimi i formuar nëpërmjet veshjes. Pra, kostumi nuk e bën vetëm njeriun, por kostumi është vetë njeriu. Jemi të vetmet qenie të gjalla që kemi vetëdijen e stolisjes për hir të zbukurimit në vetvete. Në këtë kuptim, veshja është pjesë përbërëse e species sonë.
A mund të ndryshojë jetën tonë një veshje? A ju ka ndryshuar juve?
Unë jam një ëndërrimtare që besoj se gjërat e vogla, mund ta bëjë botën një vend më të bukur për një moment. Sepse nëse imagjinojmë dikë duke ecur në rrugë me një veshje që e bën atë të lumtur dhe nëse ajo grua i dhuron një buzëqeshje dikujt që në atë moment kishte nevojë për atë buzëqeshje, atëherë ajo veshje indirekt ‘ndryshon’ jetën tonë. Nëse mund ta imagjinojmë këtë, atëherë mund të ndodhë.
Si duket dikush që vesh rrobat tuaja, çfarë ka më shumë tek ajo, çfarë arrin të shprehë (të paktën pjesërisht) duke zgjedhur modelet tuaja?
Kjo është dikush që ka njohur veten dhe që nuk ka frikë të jetë ajo që është. Asaj i pëlqen ndjenja e fuqisë dhe autoritetit që i japin pjesët autentike, ngjyrat dhe printimet. Kjo mbart njëkohësisht energji mashkullore dhe sensualitet femëror dhe pamja e së cilës është gjithmonë në qendër të vëmendjes – edhe pse nuk ka shumë rëndësi për të, sepse nuk varet nga miratimi i të tjerëve.
A ka Orhidea ditë të zymta kur nuk di çfarë të veshë, cili është kombinimi i saj i preferuar dhe a ka ndonjë gjë që nuk do të vishte kurrë.
Në ditët e zymta, Orhidea ndihmon veten të ndihet rehat dhe me stil duke zgjedhur një kombinim të thjeshtë dhe elegant. Ajo preferon të veshë një bluzë të bardhë ose gri, që është e lehtë dhe e përshtatshme, bashkë me një xhaketë të errët, ndoshta në ngjyrë të zezë ose të gjelbër të errët. Pantallonat e saj zakonisht janë të zeza, duke krijuar një pamje të koordinuar dhe të rafinuar.
Megjithatë, ka disa veshje që Orhidea kurrë nuk do të vishte. P.sh., ajo nuk do të zgjidhte ndonjëherë veshje shumë të ndritshme, si ngjyrat neon, apo ato me dizajne të çuditshme, pasi ato nuk përputhen me preferencat e saj estetike. Për Orhiden, stili i saj shpreh personalitetin e saj, dhe ajo dëshiron të ruajë një balancë mes rehatisë dhe elegancës.
Si krijuese e modës edhe për meshkuj, çfarë u përgatitni klientëve tuaj për sa i përket qëndrueshmërisë, çfarë këshillash u jepni atyre?
Për sa i përket audiencës mashkullore, unë jam mbështetëse e faktit që nuk ka gardërobë mashkullore dhe femërore dhe në këtë kuptim sugjerimi im ka qenë gjithmonë: “Vishni çfarë t’ju dojë shpirti, por vetëm me mençuri!”
Përveç brengosjes, shpërthimeve të energjisë dhe krijimtarisë së re, çdo ndryshim i madh sjell edhe disa sfida. Cila ishte sfida më e madhe me të cilën u përballët që nga momenti i punës në studio?
Sfidat ndodhin në nivelin e përditshëm të biznesit, në punën me të tjerët, por nëse flasim me saktësi për bashkëpunim në nivel të përditshëm – deri më tani ai po ecën shumë mirë dhe me sukses.
Cilat janë planet tuaja për periudhën e ardhshme? A ka diçka që dëshiron të krijosh, por nuk e ke pasur ende mundësinë?
Planet e këtij universi të modës janë që të vazhdoj të ndjek postulatet e qëndrueshmërisë dhe të mos ndalem në këtë drejtim. Kam shumë kërkesa që lidhen me modën, skenën artistike, por edhe disa projekte, për të cilat është shumë herët të flas, për sa kohë jam tërësisht e fokusuar në markën time. /Telegrafi/