Nis seanca për të arrestuarit për sulmin ndaj Mëngjesit, ri-kualifikohet vepra penale

Ka nisur seanca me dyer të mbyllura për masën e sigurisë ndaj dy të arrestuarve për sulmin e dhunshëm ndaj avokatit Sokol Mëngjesi. Para Gjykatës së Tiranës kanë dalë Dritan Nano dhe Dorian Alia.

Prokuroria ka rikualifikuar veprën penale nga “Vrasja e funksionarëve publik mbetur në tentativë” në “Plagosje të rendë me dashje kryer në bashkëpunim” dhe “Kundërshtim dhe goditje e gjyqtarit e kryer në bashkëpunim”. Prokuroria kërkon masën e “Arrestit me burg” si për 2 të ndalurit, por dhe 3 të shpallurit në kërkim, Drivald Alia, Elton Kasaj dhe Romario Tabaku.

Gjendja shëndetësore e avokatit Sokol Mëngjesi vijon të jetë e rënduar duke mos pasur asnjë përmirësim. Që prej mesditës së të mërkurës ai ndodhet në koma në reanimacion.

Deri në këto momente nga ana e stafit mjekësor nuk është vlerësuar e nevojshme që t’i nënshtrohet ndërhyrjes kirurgjikale, por orët në vijim janë vendimtare nëse do të ketë reagim nga pacienti. Në spitalin e Traumës kanë shkuar të premten për të vizituar avokatin Sokol Mëngjesi, drejtori i policisë së Tiranës, Tonin Vocaj dhe zv/drejtori Alket Shatro.

3 autorët e kësaj ngjarje të rëndë vijojnë ende në arrati./euronewsalbania/