Nis iniciativa për ta kthyer Hysin

Klubi i Futbollit Trepça’89, përkatësisht kryetari i saj Abedin Zeka, ka marrë një iniciativë ku pretendon të zhvillojë një takim me përfaqësues të klubeve me të cilët do të diskutonte rreth lajmit që skuadra e Hysit të shuhet dhe të mos i vazhdojë garat në elitën e futbollit tonë, gjithnjë në përpjekje që Hysi megjithatë të mos shuhet.. Sipas numrit një të skuadrës së Trepçës’89, takimi do të mbahet të martën e ardhshme, dhe në të shpreson se do të marrë pjesë edhe kryetari i KF Hysit, Hysen Sadiku.

“Takimi i klubeve ka karakter miqësor dhe ka për qëllim avancimin dhe masivizimin e futbollit të Kosovës e jo shuarjen e klubeve, siç është rasti i Hysit, një klub me renome dhe me rezultate shumë të mira në futbollin e Kosovës”, ka thënë Zeka.

Sa i përket klubit Trepça’89, ajo dje ka zhvilluar një takim miqësor ndaj Istogut, të cilin e ka mposhtur me rezultat 2:1. Për “minatorët” golat i shënuan Labinot Jetullahu e Sadri Ademi ndërsa për Istogun, Policaj. /Zëri/Telegrafi/