Nga Nika te Krasniqi, Dabiqaj e Januzi – formacioni më i mirë i xhiros së gjashtë në Albi Mall Superligë

Ka përfunduar xhiro e gjashtë në Albi Mall Superligën e Kosovës në futboll, xhiro ku katër ndeshje i kanë takuar vendasve dhe një mysafirëve.

Drita ka triumfuar në derbin e javës, pasi mposhti Ballkanin me rezultat minimal 1-0 falë golit nga Albert Dabiqaj.

Prishtina ka bërë detyrën ndaj Dukagjinit duke e mposhtur me rezultat 3-0, njësoj siç bëri Suhareka duke ndalur pikët e plota në shtëpi pasi mposhti Feronikelin ’74 me rezultat të pastër 2-0.

Fitore para adhuruesve të vet ka shënuar edhe Malisheva duke triumfuar 2-1 ndaj Gjilanit, derisa Llapi mori tre pikë nga udhëtimi në Ferizaj duke mposhtur ferizajasit me rezultat minimal 0-1.

Telegrafi Sport vazhdon të sjell formacionin më të mirë të javës, ku dominohet nga futbollistët e Dritës dhe Prishtinës.

Portieri: 

Ardit Nika bëri paraqitje shumë të mirë në fitoren e Prishtinës 3-0 ndaj Dukagjinit. Klinasit krijuan disa mundësi shumë të mira shënimi, por Nika ishte fantastik në portë duke pritur disa prej tyre dhe duke mbajtur portën e pastër.

Mbrojtësit:

Besnik Krasniqi si gjithmonë ishte fantastik te Drita. Mbrojtësi i djathtë u angazhua shumë si në sulm ashtu duke qenë nga më të mirët. Gjithashtu Krasniqi e nxjerri nga loja edhe Bernard Karricën e Ballkanit me karton të kuq.

Në qendër të mbrojtjes është Egzon Bejtullai që shkëlqeu ndaj Ballkanit. Bejtullai së bashku me Juan Mesan ishin të pakalueshëm, derisa mbrojtësi tetovar dhuroi edhe asistimin te Dabiqaj që realizoi golin e fitores.

Së bashku në qendër të mbrojtjes me Bejtullain është edhe Ardi Ajdini. Talenti prishtinas ishte i pakalueshëm në sfidën ndaj Dukagjinit duke qenë një lider në mbrojtjen bardhekaltër.

Në krahun e majtë vjen Ilir Blakcorri që gjithashtu ishte ndër futbollistët kyç të Llapit në fitoren 0-1 në udhëtim te Ferizaj.

Mesfusha:

Vesel Limaj po kalon nëpër një formë të shkëlqyer që prej transferimit te Malisheva dhe ai e dëshmoi edhe në sfidën ndaj Gjilanit. Limaj dominoi në mesfushë duke shënuar edhe një gol në fitoren e Malishevës 2-1.

Albert Dabiqaj është heroi i Dritës në sfidën ndaj Ballkanit. Mesfushori deçanas ishte një motor i skuadrës bardhekaltër duke dominuar në mesfushë, derisa shënoi edhe golin e fitores 1-0 ndaj kampionit në fuqi.

Albin Krasniqi është në rolin e mesfushorit ofensivë, pasi kaçanikasu ishte thjesht i papërmbajtshëm në sfidën ndaj Dukagjinit. Numri 10 i Prishtinës kishte rol kryesor në autogilin e shënuar nga klinasit për 1-0, derisa realizoi edhe një gol tjetër për të qenë ylli i ndeshjes në fitoren e kryeqytetasve 3-0 ndaj klinasve.

Sulmuesit:

Mevlan Zeka vazhdon të jetë vendimtar te Suhareka. Sulmuesi gjakovar realizoi dy gola në fitoren komode të skuadrës së tij 2-0 ndaj Feronikelit ’74.

Vendimtar për skuadrën e tij ka qenë edhe Ahmed Januzi. Sulmuesi veteran shënoi golin e vetëm ndaj Ferizajt, gol që i solli tre pikët Llapit nga ky udhëtim i vështirë.

Në krahun e majtë të sulmit është Laurent Xhylani. Talenti i madh i Malishevës shënoi golin e fitores ndaj Gjilanit, duke ndalur pikët e plota në stadiumin ‘Liman Gegaj’. Me golin ndaj Gjilanit, talenti Xhylani i bëri vetës dhuratë për ditëlindje.

Trajneri:

Zekirija Ramadani triumfoi sërish ndaj Ballkanit me Dritën e tij. Drita e Ramadanit dominoi nga fillimi deri në fund ndaj kampionit në fuqi, derisa u vërejt dora e Ramadanit që kishte përgatitur skuadrën për mrekulli përkundër se luajti edhe në mesjavë. Për këtë xhiro, Ramadani është trajneri më i mirë. /Telegrafi/