Netflix prezanton aplikacion për kontrollin e lojërave, përdoret si kontrollues

Shtytja e Netflix në botën e videolojërave vazhdon dhe kompania tani ka zbuluar një aplikacion të menaxhimit të lojërave për pajisjet iOS.

Aplikacioni, i quajtur thjesht Netflix Game Controller, është një “kontrollues virtual” dhe ju lejon të përdorni telefonin ose tabletin tuaj si një “kontrollues standard”, pasi pajisja të lidhet me televizorin.

Në këtë mënyrë, përdoruesi mund të shijojë më mirë lojërat e disponueshme përmes shërbimit Netflix, transmeton Telegrafi.

Aplikacioni i destinuar për iOS tashmë është i disponueshëm për shkarkim dhe ende nuk dihet nëse do të shfaqet versioni për Android.

Nuk dihet ende se cilët tituj do të mbështeten dhe në përshkrimin e aplikacionit thuhet vetëm se “funksionaliteti i tastierës së lojës do të vijë së shpejti në Netflix”.

Kjo nuk është një surprizë e madhe duke marrë parasysh faktin se kompania po rritet si një botues i lojërave indie.

Netflix Games ka publikuar ose ka pritur gati 70 tituj në dy vitet e fundit, disa prej të cilëve janë të disponueshëm përmes aplikacionit standard të transmetimit Netflix, ndërsa të tjerët mund të qasen përmes pajisjeve celulare dhe konzollave të videolojërave. /Telegrafi/