Nëna mohon përfshirjen e të birit në çështjen e financimit të terrorizmit: 19 mijë frangat e gjetura në çizme janë të miat

Në procesin gjyqësor ndaj Nehrudin Skenderit, i akuzuar për terrorizëm, dëshmitarja Amella Skenderi dëshmoi se paratë e gjetura në banesën e saj janë të saj dhe të bashkëshortit, duke mohuar çdo lidhje të të birit me to.

Ajo deklaroi se kishte fshehur 19 mijë franga dhe 20 mijë euro në çizmet e saj, për të cilat tha se janë kursime personale.

“Dëshiroj të theksoj se shumën prej 39 mijë euro, si dhe të tjera, janë paratë e mia personale. Nehrudini nuk ka asnjë lidhje me to,” tha Skenderi në sallën e gjyqit.

Gjykata e Apelit ka kthyer çështjen në rigjykim për Nehrudin Skenderin, për sa i përket konfiskimit të mjeteve financiare, me Prokurorinë Speciale të Republikës së Kosovës (PSRK) që pretendon se këto para janë përdorur për financimin e veprave terroriste.

Gjatë dëshmisë së saj, Skenderi tha se punon si profesoreshë në Kuvajt dhe se burri i saj është imam në një xhami atje, duke shtuar se të ardhurat nga punët e tyre kanë mundësuar krijimin e pasurisë së sekuestruar.

Prokurori Bekim Kodraliu e pyeti dëshmitaren nëse kishte ndonjë dokument që vërteton se shumën prej 39 mijë euro e kishte marrë dhuratë nga babai i saj.

Ajo u përgjigj se nuk kishte nevojë për dokumente për një dhuratë të tillë, duke përmendur parimet fetare islame.

Në fund të dëshmisë, Skenderi shprehu frikë për sigurinë e djalit të saj, por jo për veten, dhe u shpreh e trishtuar për situatën.

“Unë si person fetar nuk guxoj të gënjej. Këto janë rregullat e mia, dhe ju si gjykatë keni rregullat tuaja. Unë kam deklaruar si një qytetare e Kosovës që respekton ligjin,” përfundoi ajo.

Në këtë rast, përveç Nehrudin Skenderit, janë të akuzuar edhe Ardijan Gjuraj, Ergim Syla dhe Mentor Bellaqa, të cilët janë dënuar më herët nga Gjykata Themelore e Prishtinës me 30 vjet e gjysmë burgim dhe 5 mijë euro gjobë për përgatitje të akteve terroriste në Kosovë./Telegrafi/