Në shitje biletat për finalen e LK: Mësoni çmimet dhe numrin e biletave për çdo klub

Finalistët e Ligës së Kampionëve këtë sezon do t’i kenë nga 20.000 bileta secili klub, për duelin që do të zhvillohet në San Siro.

Shtëpia e Milanit dhe Interit ka kapacitet prej 71.500 ulësesh për ndeshjet evropiane, ndërsa finalja e garës më të madhe evropiane do të zhvillohet më 28 maj (e shtunë).

Biletat kanë dalë në shitje ditën e martë, ndërsa UEFA ka bërë të ditur edhe çmimet e biletave. Në kategorinë e parë një biletë kushton 440 euro, në të dytën 320 euro, të tretën 160 euro dhe të katërtën 70 euro.

Prej biletave që shiten online, 6.000 do të jenë në dispozicion për publikun e gjerë, derisa 25.500 të tjera janë të rezervuara për Komitetin lokal organizues, UEFA-n dhe Federatat kombëtare, partnerët komercialë dhe transmetuesit, si edhe për programet promovuese.

Në finalen e vitit të kaluar, ndërmjet Barcelonës dhe Juventusit që u zhvillua në Berlin, po ashtu dy klubet morën nga 20.000 bileta, krahas kapacitetit prej 70.500 ulësesh.

Ndërsa një vit më parë në Lisbonë, Real Madridi dhe Atletico Madridi patën nga 17.000 bileta përpara një turme prej 61.000 tifozësh. /Telegrafi/