Në QMF “Ereniku” në Gjakovë mungon specialisti për leximin e mamografisë

Tetori është muaji i cili i dedikohet ndërgjegjësimit ndaj kancerit të gjirit, që vazhdon të jetë lloji më i përhapur i kancerit në vendin tonë.

Gjatë këtij muaji përveç promovimit të fushatave vetëdijësuese rreth kësaj sëmundjeje, bëhet edhe promovimi për vizita të vazhdueshme që duhet të bëhen, të cilat mund të jenë hapi i parë drejt zbulimit të kësaj sëmundjeje në një fazë sa më të hershme.

Në qytetin e Gjakovës, përkatësisht në Qendrën e Mjekësisë Familjare ‘Ereniku’ ofrohet një nga shërbimet më të rëndësishme që është mamografia, ku që nga muaji janar e deri më tani, në këtë qendër janë kryer më shumë se 600 mamografi, shërbim ky i cili është papagesë.

Mirëpo pavarësisht nga kontrollat që kryhen nga kjo qendër përmes mamografit, që nga muaji prill kjo qendër ka mbetur pa praninë e një mjeku specialit për leximin e rezultateve të mamografisë.

Theksojmë që gjatë ditës së djeshme kur u shënua edhe fillimi i muajit për ndërgjegjësimin ndaj kësaj sëmundjeje, ministri i Shëndetësisë, Arben Vitia, kishte potencuar që në dy vitet e fundit, mbi 50 për qind e grave të diagnostifikuara me kancer të gjirit kanë qenë në stadin e parë ose të dytë, gjë që sipas minister Vitia tregon vetëdijesimin te gratë dhe rritë mundësitë për një trajtim të suksesshëm. /Telegrafi/