Stil Trend Këshilla Lifestyle

Ndryshimi në shprehitë ushqyese të meshkujve dhe rekomandimet

(Foto: Pexels)

Para 1 viti

Të cilësuara si superushqime, ato janë të dobishme për të gjithë, pavarësisht nga gjinia, por disa ushqime përmbajnë lëndë ushqyese specifike që mund të ndihmojnë me disa probleme të zakonshme shëndetësore të meshkujve.

Një studim i fundit mbarëkombëtar i Cleveland Clinic zbuloi se 81 për qind e meshkujve thanë se mendonin se ishin relativisht të shëndetshëm. Megjithatë, realiteti i pafat është se shprehitë e përditshme të tyre, të vetëraportuara, japin një pamje krejtësisht të ndryshme dhe alarmante.

Kur u pyetën në lidhje me shprehitë e tyre shëndetësore, sondazhi zbuloi se 83 për qind e meshkujve amerikanë kanë përjetuar stres në gjashtë muajt e fundit, 44 për qind nuk kanë një aktivitet fizik vjetor, 44 për qind nuk kujdesen për shëndetin e tyre mendor dhe vetëm 50 për qind ishin testuar për kanceret e shpeshta, duke përfshirë kancerin e prostatës, zorrës së trashë, lëkurës, testikujve dhe fshikëzës.

Kjo është veçanërisht shqetësuese duke pasur parasysh se të dhënat tregojnë se meshkujt përballen me rreziqe dukshëm më të larta të sëmundjeve të zemrës, sëmundjeve të mushkërive, kancerit të prostatës dhe goditjes në tru.

Ka ndryshime të shumta në stilin e jetesës që meshkujt mund të bëjnë për ta përmirësuar shëndetin e tyre, dhe një nga fushat kryesore të fokusit është ushqimi. Rezultatet e sondazhit treguan gjithashtu se 49 për qind e meshkujve thanë se nuk ndiqnin një dietë të shëndetshme, duke treguar se ka shumë vend për përmirësim.

Frutat arrore

Duke u fokusuar ende në shëndetin e zemrës, ngrënia e një shumëllojshmërie arrore, si bajame, fëstëkë, shqeme dhe arra, mund të ndihmojë në mbajtjen e zemrës së meshkujve të shëndetshme ndërsa plaken.

Këto fruta të vogla janë të mbushura me proteina, fibra dhe yndyra esenciale, duke i bërë një zgjedhje rostiçerie shumë ushqyese. Arrat përmbajnë nivele të larta të acidit alfa-linolenik, një lloj acidi yndyror omega-3, i njohur për përfitimet e tij për shëndetin e zemrës, kurse fëstëkët janë të mbushur me antioksidantë dhe ofrojnë të nëntë aminoacidet thelbësore, duke i bërë ato një proteinë të plotë me bazë bimore.

Kërpudhat

Kërpudhat janë një tjetër ushqim që mund të kontribuojë ndjeshëm në shëndetin e meshkujve. Për shembull, janë burime të lëndëve ushqyese, si vitamina D, seleni dhe antioksidantët, të cilët janë jetikë për ruajtjen e shëndetit të mirë, ndërsa prania e antioksidantëve në kërpudha ndihmon në uljen e rrezikut të sëmundjeve kronike duke luftuar radikalet e lira të dëmshme.

Seleni mbështet sistemin imunitar dhe funksionin e tiroides, dhe megjithëse problemet e tiroides konsiderohen më shpesh te femrat, meshkujt gjithashtu mund të zhvillojnë probleme me funksionin e tiroides. Kërpudhat përmbajnë beta-glukane, një lloj fibre që kontribuon në shëndetin e zemrës duke ndihmuar në rregullimin e niveleve të kolesterolit.

Domatet

Domatet janë një ushqim i zakonshëm plot me antioksidantë të fuqishëm. Një antioksidant i gjetur në domate – likopeni – është lidhur me mbrojtjen kundër sëmundjeve kronike, si kanceri i prostatës dhe sëmundjet kardiovaskulare.

Tashmë e dimë se meshkujt kanë një rrezik më të lartë të sëmundjeve kardiovaskulare, kjo është arsyeja pse ngrënia e ushqimeve të shëndetshme për zemrën është kaq e rëndësishme, por përfshirja e lëndëve ushqyese (si likopeni) në dietën tuaj për të ndihmuar në mbrojtjen kundër kancerit të prostatës, është gjithashtu thelbësore.

Përveç likopenit, domatet përmbajnë vitamina A, K dhe kalium. Sipas New England Journal of Medicine, ngrënia e një diete me pak natrium duke rritur marrjen e kaliumit, mund të ndihmojë në parandalimin e sëmundjeve kardiovaskulare.

Boronicat

Boronicat janë një ushqim i njohur për antioksidantët e tyre jashtëzakonisht të fuqishëm, veçanërisht një grup flavonoidësh të quajtur antocianin.

Marrja e rregullt e boronicave lidhet me humbjen dhe mirëmbajtjen e peshës, zvogëlimin e rrezikut të sëmundjeve kardiovaskulare dhe mbrojtjen e sistemit nervor.

Një raport i botuar në revistën Nutrients tregon se polifenolet (përbërjet bimore) që gjenden te boronicat, lidhen gjithashtu me uljen dhe menaxhimin e kolesterolit LDL (‘kolesteroli i keq’) dhe kjo mund të ndihmojë në parandalimin e sëmundjeve të zemrës.

Jogurti

Meshkujt duhet të marrin në konsideratë të konsumojnë më shumë jogurt, pasi është një ushqim për një mëngjes të ekuilibruar dhe i plotësuar që kombinon yndyrën, karbohidratet dhe proteinat në një mënyrë që pak ushqime të tjera mund ta bëjnë. Jogurti me yndyrë të plotë mund të jetë më i vështirë për t’u gjetur në dyqane ushqimore, por do t’ju ndihmojë të ndiheni më të ngopur dhe të sigurojë energji afatgjate midis vakteve.

Konsumimi i jogurtit sigurisht që mund të ketë një efekt pozitiv në energjinë dhe ngopjen e përditshme, por disa kërkime mbështesin gjithashtu përfitimet afatgjata të tij. Sipas një studimi të botuar në British Journal of Nutrition, meshkujt që hanin rregullisht produkte qumështi të fermentuara (për shembull, jogurt dhe djathë) kishin një rrezik më të ulët të sëmundjes së arterieve koronare. /Telegrafi/