Pas moshës 70-vjeçare, pothuajse 90 për qind e meshkujve kanë një prostatë të zmadhuar
Prostata është një organ mashkullor me gjëndra muskulore në legenin e vogël poshtë pjesës së poshtme të fshikëzës urinare dhe përpara pjesës fundore të zorrës së trashë.
Rritja dhe zhvillimi i prostatës kushtëzohet hormonalisht, veçanërisht nga veprimi i testosteronit.
Suplementet dhe zmadhimi beninj i prostatës
Suplementet ushqimore janë të dobishme për mangësitë e konfirmuara të vitaminave, të tilla si vitaminat D, B6 ose B12, të cilat janë të shpeshta në pleqëri.
Meshkujt që janë diagnostikuar me zmadhim beninje të prostatës përpiqen të qetësojnë simptomat e pakëndshme me suplemente.
Suplementet për prostatën - çfarë thonë studimet?
Urologu dhe kirurgu Dr. Quoc-Dien Trinh nga spitali Brigham and Women’s, i lidhur me Harvard-in, thotë se disa studime sugjerojnë efekte pozitive të suplementeve për shëndetin e prostatës.
“Megjithatë, këto të dhëna janë shpesh vëzhguese dhe larg të qenit përfundimtare apo të mjaftueshme për të dhënë rekomandime të qarta,” thekson Dr. Trinh, transmeton Telegrafi.
Prostata dhe ndikimi i hormoneve
Hiperplazia beninje e prostatës (BPH) është një gjendje shumë e zakonshme tek meshkujt e moshuar. Pas moshës 70-vjeçare, rreth 90% e burrave përjetojnë një shkallë të zmadhimit të prostatës.
BPH është një zmadhim jo-kancerogjen i prostatës si pasojë e shumimit të qelizave të reja. Shkaku i saktë nuk dihet, por besohet se lidhet me ndryshimet hormonale. Simptomat përfshijnë: vështirësi në urinim, rrjedhë e dobët dhe e ndërprerë e urinës.
Çfarë përmbajnë suplementet për prostatën?
Suplementet për prostatën përmbajnë përbërës si: Saw palmetto (testerasta palma), Seleni, Zinku, Beta-sitosteroli. Ndërsa disa studime janë inkurajuese, ende nuk është e qartë si ndikojnë këto përbërës te të gjithë pacientët.
Saw Palmetto
Kjo bimë është një lloj palme që rritet në juglindje të SHBA-ve. Ekstrakti nga fruti i saj besohet se mund të lehtësojë simptomat e zmadhimit të prostatës. Dy studime të financuara nga National Institutes of Health nuk gjetën ndonjë efekt më të mirë sesa placebo. Megjithatë, disa studime të tjera sugjerojnë një ndikim të lehtë pozitiv.
Seleni dhe prostata
Disa kërkime sugjerojnë se seleni mund të ketë rol mbrojtës ndaj kancerit të prostatës. Por, studime të tjera nuk konfirmojnë ndonjë përfitim të dukshëm. Gjithashtu, nuk ka konsensus për dozën e saktë terapeutike.
Zinku dhe prostata
Zinku gjendet në çdo ind të trupit, por në prostatë ndodhet në përqendrimin më të lartë. Ka rol thelbësor në funksionimin e prostatës. Mungesa e zinkut mund të rrisë rrezikun për zmadhim apo kancer të prostatës, sipas disa studimeve. Por, studimet vëzhguese nuk e vërtetojnë këtë lidhje. Për më tepër, marrja e zinkut në doza më të mëdha se 100 mg në ditë mund të rrisë rrezikun për kancer të prostatës.
Beta-sitosteroli
Beta-sitosteroli është një sterol bimor që gjendet natyrshëm në fruta, perime, arra dhe fara. Ai mund të ulë nivelet e kolesterolit dhe besohet të ndihmojë në lehtësimin e simptomave të zmadhimit të prostatës.
Vetëm beta-sitosteroli nuk e zvogëlon prostatën e zmadhuar. Por, sipas një studimi të revistës BMC Urology (2020), meshkujt që morën vaj palme (Saw Palmetto) të pasuruar me beta-sitosterol për 12 javë patën përmirësim të simptomave urinare.
Rëndësia e një diete të shëndetshme për prostatën
Pavarësisht rolit të mundshëm të suplementeve, Dr. Trinh thekson rëndësinë e një diete të shëndetshme, si dieta mesdhetare apo DASH, të pasura me perime, fruta, drithëra integrale, perime krucifere (si brokoli), arra dhe vaj ulliri. Ai rekomandon konsumimin e peshkut në vend të mishit të kuq.
“Studimet vazhdimisht tregojnë se një dietë bimore ndihmon në uljen e kolesterolit, tensionit të lartë dhe mbipeshës, duke mbrojtur kështu shëndetin e zemrës dhe, ajo që është e mirë për zemrën, është e mirë për tërë trupin, përfshirë prostatën,” përfundon Dr. Trinh. /Telegrafi/
