Ndërmarrja Publike Banesore fton inxhinierët t’i bashkangjiten aksionit për inspektimin e ndërtesave në zonat e prekura nga tërmeti

Ndërmarrja Publike Banesore së bashku me Komunën e Prishtinës, universitetet, asociacionet, grupet e tjera vullnetare dhe Ministrinë e Arsimit në Shqipëri po vazhdojnë inspektimet e ndërtesave në zonat e prekura nga tërmeti në Shqipëri.

Për t’i inspektuar sa më shpejt dëmet e shkaktuara nga tërmetet e ditëve të fundit, Ndërmarrja Publike Banesore fton të gjithë inxhinierët e ndërtimit t’i bashkëngjiten aktivitetit vullnetar për inspektimin e ndërtesave në zonat e prekura nga tërmeti.

Tutje në njoftim bëhet e ditur se nisja nga Prishtina do të bëhet ditën e mërkurë, pra në dt. 04.12.2019, në ora 17:00 nga zyrat e Ndërmarrjes Publike Banesore (rr. Xhevdet Doda, nr. 32, Lakrishtë), kurse kthimi nga Tirana do të bëhet në ditën e diel, dt. 08.12.2019, në orën 16:00.

“Përgjegjës në organizimin e grupit “Inxhinierët Vullnetar nga Kosova (IVK)” janë: Ndërmarrja Publike Banesore e Komunës së Prishtinës, Universitetet, Asociacionet dhe grupet e tjera vullnetare të organizuar nga Kosova. Aspektet logjistike si: akomodimin, automjetet, derivatet, ushqimet dhe pajisjet, janë të mbuluara nga donatorët e siguruar nga IVK dhe nga Qeveria Shqiptare. Personi kontaktues i autorizuar nga IVK për inxhinierët vullnetarë është: URAN KYÇYKU, tel: +38344134704, email: kycyku.uran@gmail.com “, thuhet në njoftim.

Ndërmarrja Publike Banesore bën të ditur se inspektimi i ndërtesave (objekte banimi, spitale, shkolla, ura, etj.) do të bëhet në bashkëpunim dhe me ftesë të Qeverisë së Shqipërisë, përkatësisht “Institutit të Ndërtimit”. /Telegrafi/