Ndalohen për 48 orë dy të dyshuar për tentim vrasje dhe sulm ndaj policit në Gjakovë

Prokuroria Themelore në Gjakovë, Departamenti për Krime të Rënda, njofton se me vendim të Prokurorit të Shtetit, ka ndaluar për 48 orë të dyshuarit P.B., dhe Z.B.

Në njoftimin e Prokurorisë, thuhet se P.B., dyshohet se sot (e premte) në një fshat të Komunës së Gjakovës, për shkak të një mosmarrëveshje të mëhershme, ka tentuar të privojë nga jeta Gj.B., duke shtënë në drejtim të tij.  Me këtë, dyshohet se ka kryer veprën penale “Vrasja në tentativë”.

Ndërsa, i pandehuri Z.B., dyshohet se sulmoi njërin zyrtar policor pasi i kishin shkuar në shtëpi për bastisje.

“Po ashtu, lidhur me këtë rast nga Departamenti i Përgjithshëm, është ndaluar në kohëzgjatje prej 48 orësh, edhe personi tjetër i dyshuar me iniciale Z.B, në datën dhe në vendin e njëjtë pasi që zyrtaret policor kanë shkuar në shtëpinë e të dyshuarit për bastisje, i dyshuari ka sulmuar njërin prej zyrtarëve policor, me këto veprime formohet dyshimi i bazuar se i njëjti ka kryer veprat penale “Sulm ndaj personit zyrtar” dhe “Mbajtje ne pronësi , kontroll ose posedim i paautorizuar i armeve”, sipas Kodit Penal të Republikës së Kosovës (KPRK)”, thuhet në njoftim.

Prokuroria njofton se ndaj të dyshuarve P.B., dhe Z.B., brenda afatit ligjor, do të paraqesë kërkesë për caktimin e masës së paraburgimit në gjykatën kompetente. /Telegrafi/