Mustafa: Thaçi po keqpërdorë emrin e Rugovës

Kreu i LDK-së Isa Mustafa, i ka reaguar Presidentit Thaçi, pasi ky i fundit, ka përmendur ish presidentin Ibrahim Rugova lidhur me shkëmbimin e territoreve.

Përmes një postimi në Facebook, Mustafa ka thënë se intervistat dhe deklarimet e Rugovës po tentojnë të manipulohen dhe kanë një prapavijë të keqe.

”E kanë gabim dhe me prapavijë të keqe ata që tentojnë të manipulojnë me intervistat dhe deklaratat e Presidentit Rugova të para 25 vjetëve. Rugova ka dhënë kontribut të jashtëzakonshëm historik në pavarësimin e Kosovës, ka shtruar ide dhe koncepte në periudha të ndjeshme kohore, jo vetëm për Kosovën por edhe për të ardhmen e shqiptarëve në trojet e tyre etnike”, ka thënë Mustafa.

Ai ka thënë se Kosova ka përmbyllur të gjitha çështjet e hapura me aktin e shpalljes së pavarësisë duke vulosur kontributin e Rugovës, UÇK-së dhe aleatëve ndërkombëtarë.

”Ndërkaq, Kosova ka përmbyllur të gjitha çështjet e hapura me aktin e shpalljes së pavarësisë duke vulosur kontributin e Presidentit Rugova, të UÇK-së dhe aleatëve tanë ndërkombëtar”, ka shkruar ai.

Më tej, Mustafa ka thënë se askush, madje as Thaçi, nuk ka të drejtë të keqpërdorë emrin e Rugovës për të vënë në pikëpyetje integritetin territorial dhe sovranitetin e Kosovës.

”Askush nuk ka të drejtë ta keqpërdorë emrin e Presidentit Ibrahim Rugova për të vënë në pyetje integritetin territorial dhe sovranitetin e Republikës së Kosovës, as Presidenti Thaçi dhe as këndesat e tij”, ka shkruar Mustafa.