Murati e Hoti përplasen për klimën e të bërit biznes në Kosovë

Përplasjet për çështje ekonomike mes ministrit të Financave, Hekuran Murati, dhe ish-ministrit të Financave, Avdullah Hoti, tashmë janë bërë të zakonshme.

Së fundmi përfaqësuesit e qeverisë dhe opozitës janë përplasur në lidhje me ambientin e të bërit biznes.

Në fillim deputeti i LDK-së, Avdullah Hoti ka shkruar në Facebook se ambienti për biznes në vitin 2023 në Kosovë është përkeqësuar në të gjitha aspektet krahasuar me vitin 2017.

Sipas Hotit, të gjithë treguesit, pa asnjë përjashtim, janë përkeqësuar, por që si shton se migrimi i fuqisë punëtore ka dalë të jetë pengesa kryesore.

“Shqetësuese është përkeqësimi sa i përket shërbimeve të Administratës Tatimore dhe Administratës Doganore. Edhe perceptimi për korrupsionin është rritur. Qasja në kredi dhe kostoja e financimit është përkeqësuar gjithashtu. Sigurimi i lëndës së parë është bërë dukshëm më i vështirë. Interesant është e gjetura se qasja në informacion për ndërmarrjen gati është dyfishuar si pengesë”, ka shkruar Hoti në Facebok.

Hoti shton tutje se në këtë ambient për biznes, “natyrshëm se rritja ekonomike bie në nivele shumë të ulëta”.

Ai në fund thotë se për këto të dhëna i është referuar Riinvestit.

Për të gjitha këto pika përgjigje ka dhënë ministri Hekuran Murati përmes një reagimi ndaj Avdullah Hotit.

Murati ka vënë në dyshim këto shifra, e madje duke kritikuar edhe institucionin ku është referuar Hoti.

“Ky studim ka shumë shpërputhje me gjendjen faktike, që len të kuptohet se, ose metodologjia e përdorur për matje është gabim, ose se, edhe një institucion arsimor/hulumtues si Riinvest është bërë instrument i axhendës së politikave ditore të opozitëbërjes. Për hir të institucionit, uroj që të jetë e para, përkundër afërsisë evidente të këtij institucioni me eksponentë të LDK-së”.

Murati tutje thotë se gjendja faktike është që as edhe një normë tatimore e vetme nuk është rritur.

Ai thotë se nuk qëndron as kritika për ngarkesat administrative dhe se sipas tij situata është përmirësuar në qeverisjen aktuale.

Tutje Murati thotë se qeveria ka krijuar Gjyaktën Komerciale, dhe trajtimi i rasteve komerciale është përshpejtuar dukshëm.

Duka kundërshtuar Hotin ai thotë se edhe gjendja me kredi është më e mirë se më parë.

“Kreditimi i bizneseve në tetor të vitit 2017 ka qenë në nivelin 1.54 miliardë euro, kurse në tetor të vitit 2023 ka qenë 2.93 miliardë euro, pra gati dyfishim”, ka vijuar Murati.

Ministri i Financave thotë se edhe me inkasimin e borxheve dhe të hyrat e ATK-së, gjendja është më e mirë se në të kaluarën.

Megjithatë Murati thotë se pajtohet me studimin se vetëm haraqi ka rënë me këtë Qeveri.

“Një indikator megjithatë, që paska rënë në 0 për vitin 2023 nga 47.3 sa paska qenë në vitin 2017, qenka “Haraçi”. Për këtë mund të pajtohem me studimin”, ka përfunduar Murati./Telegrafi/