Muaremi: Po e hetojmë mënyrën e fitimit të pasurisë nga ish-presidenti Gjorge Ivanov

Drejtori i Policisë Financiare Arafat Muaremi, mbrëmë për TV24 deklaroi se po hetohet pasuria e ish-presidentit Gjorge Ivanov.

Muaremi tha se ndihmë është kërkuar edhe nga Komisioni Shtetëror për Parandalimin e Korrupsionit, për të konfirmuar pasurinë e Ivanovit, përcjell Telegrafi Maqedoni.

“Fakt është se kemi detyrë ligjore të bashkëpunojmë dhe nga ana e Komisionit Shtetëror për Parandalimin e Korrupsionit është kërkuar ndihmë në pjesën e udhëheqjes së hetimeve financiare dhe konfirmimin e dallimit të pasurisë që është paraqitur në mënyrë ligjore dhe të pasurisë që nuk është paraqitur, gjegjësisht të konfirmohet sa është dallimi i të ardhurave të paparaqitura”.

“Drejtoria e Policisë Financiare është e gatshme në pjesën e udhëheqjes së hetimeve të këtilla, por kjo është një punë që kërkon durim dhe periudhë më të gjatë. Për të njëjtin rast është njoftuar edhe Prokuroria Themelore dhe nëse kanë udhëzime mund të na i japin”, tha Muaremi.

Ai theksoi se në këtë fazë të hetimeve kërkohet edhe prejardhja e parave, prej ku janë dhe në çfarë mënyre janë fituar./Telegrafi/