MPJ: Nuk kemi informacione se shtetas të Maqedonisë luftojnë në Ukrainë

Ministria e Punëve të Jashtme të Maqedonisë së Veriut nuk ka informacione për pjesëmarrje të mundshme të shtetasve të Maqedonisë në luftën në Ukrainë. Ky reagim i MPJ-së vjen pas njoftimit të Ministrisë së Mbrojtjes ruse se 72 shtetas tanë janë në mesin e mercenarëve të huaj që luftojnë në anën ukrainase, përcjell Telegrafi Maqedoni.

“Ministria e Punëve të Jashtme nuk ka informacione relevante lidhur me pjesëmarrjen e mundshme të qytetarëve tanë në luftën në Ukrainë, e as qytetarëve tanë të vrarë në luftë.

Përmes ambasadës në Ukrainë monitorojmë vazhdimisht dhe me kujdes situatën. Posa të ketë informacione të reja, opinioni do të njoftohet”, thonë për AIM-në nga MPJ.

Autoritetet në Moskë kanë publikuar një tabelë të atyre që i quajnë mercenarët e huaj që luftojnë në anën e Ukrainës. Maqedonia e Veriut figuron në mesin e vendeve nga vijnë “mercenarët” në Ukrainë. Sipas Ministrisë Mbrojtëse të Rusisë, që nga fillimi i luftës, në anën ukrainase kanë luftuar 79 shtetas të Maqedonisë, prej të cilëve 26 janë vrarë, 21 janë kthyer, ndërsa 32 persona nga vendi janë ende aktivë në front.

Ndër vendet ku ka “të përziera” në Ukrainë janë Shqipëria, Kroacia, Polonia, Italia, Rumania, Finlanda, Letonia, Kosova…/Telegrafi/