Me moton “Nuk ka paqe pa sigurinë e grave”, sot mbahet protestë gjithëpopullore në Prishtinë

Kolektivi për Mendim dhe Veprim Feminist sot do të mbajë protestë, duke filluar në ora 18:00 në sheshin “Zahir Pajaziti” në Prishtinë në kujtim të viktimave të femicidit dhe për sigurinë e çdo vajze dhe gruaje në Kosovë.

Kolektivi për Mendim dhe Veprim Feminist fton të gjithë në këtë solidarizim mbarëkombëtar.

“Ne shprehim revoltën tonë dhe e paralajmëruam protestën tonë gjithë popullore e cila do të bëhet të martën, duke filluar nga ora 18:00, në sheshin ‘Zahir Pajaziti’ në Prishtinë.

Ju ftojmë të gjithave/ëve në organizim dhe solidarizim mbarëkombëtar. Në kujtim të viktimave të femicidit dhe për sigurinë e çdo vajze e gruaje në Kosovë”, thuhet në njoftim.

Lexo po ashtu E pajisi me armë dhe i premtoi 30 mijë euro dorasit, Gjykata jep detaje sesi Naim Murseli e kishte planifikuar vrasjen e gruas

Ndryshe, më 29 nëntor në Prishtinë u vra 30-vjeçarja, Liridona Ademaj Murseli.

Në mesin e të dyshuarve kryesor për vrasjen e 30-vjeçares është edhe burri i saj, Naim Murseli.

Gjykata Themelore në Prishtinë ka caktuar masë paraburgimi prej një muaji ndaj tre të dyshuarve Naim Murselit, Granit Plavës, dhe Kreshnik Kokallës, të dyshuar për vrasjen e Liridona Ademajt.

Naim Murseli për shkak të veprës penale, vrasje e rëndë në bashkëkryerje, Granit Plavës për veprën penale, vrasje e rëndë dhe mbajtje në pronësi, kontroll ose posedim të paautorizuar të armëve, dhe Kreshnik Kokallës për shkak të veprës penale, marrëveshja për të kryer veprën penale, vrasje e rëndë. /Telegrafi/