Mos ua lini fatit ditët me shi dhe ngrica – ja si të zgjidhni çizme që nuk ju tradhtojnë
Sekreti i çizmeve jetëgjata fshihet gjithmonë te detajet e vogla që shumica e njerëzve as nuk i vëren. Në shikim të parë gjithçka duket bukur, moderne dhe “instagramike”. Por vetëm kur fillojnë shirat, era e ftohtë dhe ngricat e para, kuptoni çfarë keni blerë në të vërtetë. Prandaj, çizmet nuk duhen zgjedhur vetëm me zemër, por edhe me mend. Tre detaje janë kyçe nëse doni që një palë çizme t’ju zgjasin më shumë se një sezon.
Kur hyni në dyqan dhe shihni një model që ju pëlqen, është normale që fillimisht t’ju tërheqë pamja. Por testi i vërtetë i cilësisë vjen më vonë. Nga mesi i tetorit fillojnë ditët kur çizmet duhet të përballojnë gjithçka: trotuare të lagura, bordura të ngrira, ecje të gjata dhe reshje të papritura.
Nëse i kalojnë këto prova, ato do t’ju shërbejnë për vite me radhë.
Kushtojuni vëmendje këtyre 3 gjërave dhe do të shmangni blerjet e gabuara, transmeton Telegrafi.
1. Shikoni me kujdes shollën
Çizmet cilësore nuk kanë kurrë sholla të ngjitura thjesht me ngjitës. Modelet më të mira kanë qepje që lidh shollën me pjesën e sipërme, që do të thotë se nuk do t’ju ndodhë kurrë të shqitet thembra mes qytetit. Çizmet e qepura zgjasin më shumë, janë më rezistente ndaj lagështisë dhe nuk dëmtohen pas disa ditëve me shi. Kjo është diferenca mes një palë çizmesh për një sezon dhe një investimi që ia vlen.
2. Stabiliteti është po aq i rëndësishëm
Shollat e holla, të lëmuara dhe “qajnë” nëpër shira lërini për pranverë. Në vjeshtë dhe dimër ju nevojitet një shollë gome, më e trashë dhe me reliev, që nuk ju tradhton kur shkelni mbi pllaka të lagura apo beton të ngrirë. Çizmet ideale janë njëkohësisht fleksibile dhe të forta: e zbusin hapin, por ju mbajnë të sigurt në sipërfaqe të rrëshqitshme.
3. Kontrolloni brendinë e çizmeve
Materiali përcakton sa do të zgjasin çizmet në të vërtetë. Lëkura natyrale dhe eko-lëkura cilësore “marrin frymë” më mirë se sintetika dhe konsumohen shumë më ngadalë. Por po aq e rëndësishme është edhe shtresa e brendshme. Për ditët e ftohta, zgjedhja më e mirë janë materiali sintetik ose tekstili që mban ngrohtësinë. Për periudhën e ndërmjetme, zgjidhni një shtresë më të hollë, por rezistente ndaj ujit, që këmbët të mbeten të thata edhe nëse ju zë një shi i papritur.
Kur këto tre kritere bashkohen, merrni çizme që nuk janë thjesht trend sezonal, por një model që ju shërben me besnikëri nga viti në vit. Dhe pikërisht këtu qëndron sekreti i vërtetë i një palë çizmesh jetëgjata. /Telegrafi/
