Mitrovica në hall me qentë endacakë, komuna pritet ta trajtojë këtë problem përmes një tenderi

Qentë endacakë që bredhin lirshëm rrugëve vazhdojnë të mbesin ende çështje e pazgjidhur për qytetet e Kosovës. Këtë problem e ka edhe Mitrovica, ku qytetarët çdo ditë përballen me ta dhe kjo po cilësohet mjaft shqetësuese nga ana e tyre.

Një qytetar që donte të mbetej anonim për Telegrafin ka thënë se problemi i qenve endacakë në Mitrovicë qëndron që nga paslufta. Sipas tij, është e çuditshme që asnjë qeverisje komunale nuk e ka rregulluar akoma këtë problem, shkruan Telegrafi.

Ai është shprehur se grupmosha më e rrezikuar nga qentë endacakë janë fëmijët, të cilët sipas tij, gjatë kohës kur shkojnë dhe vijnë nga shkolla janë të rrezikuar më së shumti.

“Në këtë mes fëmijët janë më të rrezikuarit”, ka thënë qytetari.

Të njëjtin mendim e ndan edhe qytetarja tjetër, e cila në kushte anonimiteti për Telegrafin është shprehur se fëmijët po frikësohen çdo ditë e më shumë nga qentë endacakë.

Ajo u shpreh se të gjithë qytetarët janë të rrezikuar nga ta, por veçanërisht të vegjlit. Qytetarja tregon se fëmijët e saj i përcjellë çdo ditë deri tek shkolla, e gjitha kjo që ata të ndihen më të sigurt.

“Fëmijët po duhet me i përcjellë çdo ditë deri tek shkolla”, ka thënë ajo.

Lidhur me këtë çështje, drejtori për Siguri dhe Emergjenca në Komunën e Mitrovicës, Bahtir Maxhuni për Telegrafin ka thënë se si komunë do të hapin një projekt-tender dhe se përmes operatorëve ekonomikë do të trajtojnë këtë problem.

“Ne si komunë do të hapim projekt-tender, ku përmes operatorëve ekonomikë do të trajtojmë problemin e qenve endacakë”, ka thënë Maxhuni.

Maxhuni ka thënë se aktualisht nuk mund të ndërtojnë ndonjë strehimore ose qendër rehabilituese për qentë endacakë, por që sipas tij, përmes operatorëve ekonomik që i plotësojnë kushtet do ta zgjedhin këtë problem, transmeton Telegrafi.

“Ne si komunë deri më tani nuk kemi mundësi të ndërmarrim hapa për ndërtimin e strehimoreve. Por, kemi projektin që këtë ta bëjmë me tenderin e hapur, përmes operatorëve ekonomik që i plotësojnë kushtet dhe kanë strehimore të licencuar nga organi kompetent siç është Agjencia e Ushqimit dhe Veterinarisë së Kosovës (AVUK)”, ka thënë tutje ai.

Drejtori për Siguri dhe Emergjenca në Komunën e Mitrovicës, Bahtir Maxhuni tha në fund se ka shumë ankesa nga qytetarët për këtë problem, por sipas tij, çdo ditë po punojnë që këto ankesa të minimizohen. /Telegrafi/