Ministrja Hoxha në Berlin: Qytetarët e Kosovës meritojnë lëvizjen e lirë

Ministrja e Integrimit Evropian, Dhurata Hoxha, sot mori pjesë në Tubimin Ndërkombëtar të Berlinit, ku pjesëmarrës ishin shumë përfaqësues të shtetit gjerman nga parlamentet, qeveritë, administratat, ekonomia dhe shoqëria, si dhe përfaqësues shtetërorë, ambasadorë nga më shumë se 50 vende të botës.

Sipas një njoftimi, tubimet e tilla ofrojnë mundësi të mirë për rrjetëzim dhe diskutim të çështjeve që i kontribuojnë paqes dhe bashkëpunimit të ndërsjellët në mes të shteteve.

Në këtë tubim, Ministrja Hoxha pati rastin të takojë shumë nga këta pjesëmarrës ku i informoi për zhvillimet e fundit në Kosovë, vizionin e Kosovës drejt integrimit në Bashkimin Evropian (BE), dhe ngriti çështjen e liberalizimit të vizave për qytetarët e Kosovës duke bërë thirrje për mbështetjen e Kosovës në këtë aspekt.

Në njoftimin e bërë për media nga Ministria e Integrimit Evropian thuhet se, gjatë këtyre bisedave, ministrja Hoxha theksoi se Parlamenti Evropian mbështeti propozimin e Komisionit Evropian për liberalizimin e vizave dhe që tani kjo çështje është në duar të Këshillit dhe shteteve anëtare të Bashkimit Evropian.

Në këtë drejtim, Ministrja Hoxha vlerësoi se ky proces do të ndikonte në zhvillimin ekonomik, kulturor dhe arsimor – sidomos në zgjerimin e mundësive për rininë tonë, si përfaqësuese e vlerave të BE-së. /Telegrafi/