Ministrja Dumoshi, pjesë e samitit të rinisë nga vendet e Ballkanit

Ministrja në detyrë e Kulturës, Rinisë dhe Sportit, Vlora Dumoshi ishte pjesë e samitit të parë virtual të të rinjve nga Kosova, Shqipëria, Kroacia, Mali i Zi dhe Presheva, i cili u organizua nga “LDA” Balkan në bashkëpunim me Balkan Netëork for Citizenship Education, i cili mblodhi shtetet e Ballkanit në një formacion dhe që u mbajt mbrëmë.

Ministrja Dumoshi ekspozoi programin e rinisë dhe prioritetet e saj dhe të MKRS-së për të rinjtë e Republikës së Kosovës. Fokus i MKRS-së gjatë mandatit të saj qeverisës do të jetë angazhimi dhe shfrytëzimi i potencialit rinor për të shtyrë përpara çështje të rëndësishme.

Sipas komunikatës së Ministrisë së Kulturës, temë e përgjithshme e këtij samiti ishte “Rinia e Ballkanit në Kohën e Pandemisë COVID-19”.

Pjesë e samitit virtual ishin edhe përfaqësues nga vende të rajonit, ndër ta edhe Genci Nimanbegu, zv.Kryetar në Parlamentin e Malit të Zi; Ermina Lekaj Prljaskaj, Deputete në Parlamentin e Kroacisë; Shqiprim Arifi, Kryetar i Komunës së Preshevës; Irsa Ruçi, Drejtoreshë e Shërbimit të Përgjithshëm Kombëtar të Rinisë në Republikën e Shqipërisë.

Ministrja Dumoshi, u shpreh e kënaqur që patën mundësinë të diskutojnë për nevojat dhe prioritetet e rinisë në këtë periudhë pandemie. Shtoi se vetëm duke i bërë të rinjtë pjesë integrale të proceseve institucionale, zhvillimi mund të marrë formë në vendet e Ballkanit jug-perëndimor. /Telegrafi/