Ministri Lleshaj: Pranë viktimave të fundit të nxjerrë nga gërmadhat në Thumanë u gjet flamuri kuq e zi

Ministri i Punëve të Brendshme të Shqipërisë, Sander Lleshaj ka thënë se 28 Nëntori sivjet na gjen të goditur fort, por jo të thyer.

Lleshaj ka bërë të ditur se mbrëmë gjatë kërkimeve pranë viktimave të fundit të nxjerra nga gërmadhat në Thumanë, kanë gjetur edhe flamurin kuq e zi, transmeton Telegrafi.

“Ky flamur, që u gjet pak minuta para mesnatës së mbrëmshme, shumë pranë viktimave të fundit të nxjerra nga gërmadhat në Thumanë, sikur i ndriçoi sytë dhe zemrat e heronjve shqiptarë, që edhe me thonj kanë gërmuar pa pushim për të shpëtuar atë që mund të shpëtohej. Ishte ky flamur, i nxjerrë nga rrënojat, që për pak çaste e largoi dhimbjen e përzishme dhe ktheu dritën e shpresës”, ka shkruar ai në Facebook.

Lleshaj ka thënë se, ky flamur duhet të jetë lutja për  shpirtrat e atyre që e lanë pas, si simbolin më të lartë që bën bashkë shqiptarët kudo që janë dhe mesazhi për nderimin e festës kombëtare.

Ndryshe, nga tërmetet në Shqipëri deri tani kanë humbur jetën 40 persona, kurse mbi 650 tjerë janë lënduar./Telegrafi/