Milot Rexhepi, misionar i edukimit sportiv

Në qendër të Lipjanit prej vitesh janë bashkuar sporti dhe arsimi për të ndërtuar një të ardhme më të mirë. Në këtë qytet jeton një trajner i dalluar i futbollit i cili mishëron përkushtimin, pasionin dhe disiplinën, duke e ndarë jetën e tij në mes të tri profesioneve. Kjo ka bërë që ai të jetë shembull dhe frymëzues për të rinjtë e qytetit të Lipjanit.

Ky është Milot Rexhepi mësimdhënës i edukimit sportiv në shkollën e mesme “Adem Gllavica” në Lipjan i cili njëkohësisht është edhe trajner i përkushtuar në futboll me grupmosha të reja në klubin “Ulpiana”. Rexhepi është edhe një gjyqtar i respektuar i futsallit për Ligën e Kosovës.

Për Rexhepin, këto pozita i ka arritur me punë e përkushtim pasi që sportin e kishte pasion që nga fëmijëria.

Rexhepi është i diplomuar në master në shkencat sportive, andaj pasionin e kishte të zhvillonte jo vetëm aftësitë fizike të sportistëve por edhe karakterin e tyre.

“Profesioni në të cilin jam përcaktuar dhe e kam zgjedhur që nga fëmijëria dhe e kam vazhduar dhe kam studiuar, sot më mundëson që t’i ushtroj që të tri këto profesione njëkohësisht. Nuk është e lehtë, por është në kuadër të profesionit tim dhe sigurisht që e kam ma lehtë t’i përballoj këtyre sfidave, nëse mund t’i quaj. Futbolli si sporti më masiv në Kosovë, si çdo i ri në Kosovë është e pamundur t’i ikë kësaj ngjarjeje dhe unë, ashtu si pasionantë qysh i ri, jam marrë me futboll këtu në komunën time në Lipjan”, ka rrëfyer Rexhepi.

Historia e Milot Rexhepit është një dëshmi se me pasion e angazhim ka realizuar ëndrrat, ndërkaq përmes pozitave si mësimdhënës, trajner, e gjyqtar ai ka ndikuar në zhvillimin e të rinjve duke i motivuar që edhe ata t’i ndjekin ëndrrat e tyre.

Rexhepi tregon se në klubin “Ulpiana” në Lipjan është zhvilluar mjaftë shumë dhe me kalimin e kohës ka studiuar drejtimet e edukimit fizik.

“Kam të përfunduar nivelin master dhe njëkohësisht punoj edhe si mësimdhënës tash e njëzet vite në shkollën e mesme, Adem Gllavica, në Lipjan. Të edukuarit është proces i cili duhet punuar shumë dhe angazhuar shumë. Profesioni im si trajner dhe si lojtar është arritur vetëm përmes punës dhe disiplinës. Shkolla e futbollit “Ulpiana “ është një prej shkollave më renome. Si klub jemi shumë i vjetër dhe në kuadër të shkollës së futbollit, janë të gjitha grupmoshat e përfshira që nga ato fillestare deri tek ato më të mëdha në U 17 dhe U 19”, ka thënë Rexhepi.

Rexhepi si profesionist i kësaj pune zakonisht ka veçuar të punon vetëm me grup-mosha të reja fillestare, për arsyeje se aty kërkohet puna më e madhe pasi që janë hapat e parë kur fëmijët duhet t’i marrin dhe të drejtohen për karrierën e tyre.

“Unë provoj dhe përpiqem që bashkë edhe me kolegët e mi të bëjmë më të mirën e mundshme për këta fëmijë. Aktualisht tek ne që nga mosha 16 vjeçare pranojmë regjistrimet e para deri në moshën 19 vjeçare.  Gjashtëvjeçaret janë ata fillestarët, kur edhe fillojnë hapat e para dhe kontaktin e parë me topin dhe është shumë me rëndësi edukimi i drejtë i tyre që nga fillimi, që nga starti i tyre. Çdo fëmijë ka një talent, çdo fëmijë ka elemente. Ne çka vërejmë, çka shohim te ta, janë hapat në lëvizjet e para, të ecurit, të vrapuarit, kontakti me top, orientimi në fushë, bashkëpunimi me shokë dhe shumë elemente tjera që ne mund t’i vërejmë si profesionistë qysh në startin e tyre”, thotë më tej Rexhepi.

Rexhepi më tej tregon se me kalimin e kohës ata fokusohen më shumë në përpunimin dhe avancimin e teknikës dhe lojës me top dhe gjërave tjera përcjellëse që ju ndihmon për tu formuar si futbollist.

“Misioni im është edukimi, domethënë që në start, kudo që jam, domethënë unë e kam për mision edukimin dhe arsimimin, si në shkollë të futbollit, si në shkollën e mesme atje ku punoj. Zeja e gjyqtarit ka lindë si reflektim dhe nga pasioni i madh për sportin, unë jam njohës i mirë i rregullave të lojës së futbollit dhe të futsallit njëkohësisht.  Dhe, si rezultat i kësaj kanë tash e njëmbëdhjetë vite që e ushtroj edhe zejen e futsallit, pasi që jam pasionant i rregullave dhe i disiplinës, gjë që ma ka mundësuar marrja me sport dhe vazhdoj të jem”, bënë me dije Rexhepi.

Ai shpjegon se të jesh gjyqtar i futsallit është shumë argëtuese dhe sfiduese në të njëjtën kohë derisa aty përkushtohet për të menaxhuar një lojë e cila ka rregulla.

“Pra, mbikëqyrja dhe zbatimi i rregullave është misioni i gjyqtarëve. Të marrësh vendime aty për aty është një prej sfidave më të rëndësishme për një gjyqtar. Futsalli si lojë dinamike e shpejtë, sigurisht që ka edhe veçoritë e veta, specifikat e veta të veçanta por që me punë dhe angazhim ia dalim”, ka shtuar Rerxhepi. /Telegrafi/