Milani dhe Franck Kessie mund t’i ndajnë rrugët në këtë afat kalimtar të verës, pasi Rossonerët nuk llogarisin më në shërbimet e tij.
Mesfushori nga Bregu i Fildishtë ka qenë i rëndësishëm në skemat e Gennaro Gattusos, mirëpo tani gjërat kanë filluar të ndryshojnë me largimin e tij.
Sipas Calciomercato, Milani është duke punuar që në ditët e ardhshme ta emërojë Marco Giampaolon, pas largimit të Rinos nga San Siro.
Marco Giampaolo (Foto: Paolo Rattini/Getty Images/Guliver)
Me ardhjen e Giampaolos, Kessie pritet që me shumë gjasë të largohet nga kuqezinjtë, pasi edhe Ivan Gazidis dëshiron ta shesë.
22-vjeçari ka shënuar shtatë gola në 34 paraqitje në sezonin që lamë pas, mirëpo nuk ka arritur t’i bindë drejtuesit e Milanit që ta mbajnë edhe për një sezon.
Skuadra italiane përfundoi në vendin e pestë në Serie A, e që edhe për një edicion do të luajë në Ligën e Evropës, duke mos arritur që disa sezone të kualifikohen në Ligën e Kampionëve. /Telegrafi/
