Kryeministri Zaev jep detaje nga aksidenti tragjik i autobusit në Bullgari

Autobusi i cili herët në mëngjes morri flakë në Bullgari, ku si pasojë humbën jetën së paku 46 shtetas të Maqedonisë së Veriut është i agjencisë “Besa Trans”, që organizon turne turistike dhe për shoping në Stamboll. TV21 ka kontaktuar me kompaninë, por janë të paqasshëm.

Sipas informatave të para, në autobus gjendeshin persona të rinj të cilët ishin duke u kthyer nga ekskursioni në Turqi.

Paraprakisht, edhe kryeministri Zoran Zaev deklaroi se bëhet fjalë për një tragjedi të tmerrshme në të cilën kishte 12 fëmijë, të gjithë më të rinj se 18 vjeç, ndërsa edhe të tjerët ishin të moshës rreth 20-30 vjeçe.

“Jam në kontakt me kryeministrin Stefan Janev i cili tashmë i vizitoi njerëzit. Kam pasur rastin të bisedoj me njërin nga të mbijetuarit. Ai sqaroi se ishin në gjumë kur u dëgjua një shpërthim i fuqishëm. Kanë arritur ta thyejnë njërën dritare dhe të shpëtojnë disa njerëz. Për fat të keq, të tjerët nuk arritën. Bëhet fjalë për një tragjedi të tmerrshme sepse shumica ishin fëmijë – 12 janë më të vegjël se 18 vjeç, ndërsa edhe të tjerët janë të rinj rreth 20-30 vjeç. Pjesa më e madhe janë qytetarë tanë, por ka edhe nga Serbia”, deklaroi Zaev i cili së bashku me ministrat e Shëndetësisë dhe të Punëve të Jashtme janë para Sofjes ku do t’i vizitojnë të mbijetuarit në fatkeqësinë.