Maqedonci: Tri nga katër brigadat e ushtrisë serbe janë të vendosura përgjatë kufirit me Kosovën

Ministri i Mbrojtjes, Ejup Maqedonci, të enjten ka deklaruar se Kosova vazhdon të jetë e kërcënuar nga Serbia.

Në konferencën e fundvitit për medie, Maqedonci ka thënë se tri nga katër brigadat e ushtrisë serbe janë të vendosura përgjatë kufirit jugor të këtij shteti, pra në kufi me Kosovën.

Ai po ashtu ka përmendur vendosjen e 48 bazave operacionale të ushtrisë dhe xhandarmërisë serbe përgjatë vijës kufitare me Republikën e Kosovës.

Lexo po ashtu Maqedonci: Tri nga katër brigadat e ushtrisë serbe janë të vendosura përgjatë kufirit me Kosovën

“Kjo paraqet kërcenim të vazhdueshëm. Këtë e kemi thënë disa herë. Tri nga katër brigadat e ushtrisë serbe janë të dislokuara në jug të Serbisë”, është shprehur ministri para gazetarëve.

“Kjo paraqet kërcënim dhe militarizim të zonës jugore të Serbisë e rrjedhimisht edhe të zonës kufitare të Serbisë me Republikën e Kosovës. Pra, prezenca ushtarake normalisht se paraqet kërcënim për vendin tonë”.

Maqedonci më tej ka thënë se në vazhdimësi janë në koordinim me KFOR-in, NATO-n dhe partnerët në mënyrë që të zbusim rrezikun dhe kërcënimet që vijnë nga kjo qasje e Serbisë.

“Po ashtu, jemi duke rritur kapacitetet tona në mënyrë që të mund të përballemi me rreziqet të cilat afektojnë sigurinë e qytetarëve tanë”, ka deklaruar ai. /Telegrafi/