Mediat evropiane për El Clasicon

El Clasico të hënën pushtoi faqet e para të gazetave sportive jo vetëm në Spanjë por në të gjithë Evropën.

Mediat iberike janë zgjuar me humore të ndryshme pasi dielli po shkëlqen në Katalonjë, ndryshe nga rajoni i Kastilias ku retë kanë mbuluar qiellin.

Kështu, e përditshmja madrilene “Marca” zgjedh kryetitullin e thjeshtë “Rihapet La Liga”.

E njohur për sulmet e ashpra ndaj skuadrës katalanase, këtë herë “Marca” nuk zgjedh rrugën e polemikave, duke theksuar se fitorja e Barcelonës në Madrid rikthen Atleticon në vendin e parë të klasifikimit. Pothuajse të njëjtën stil ndjek edhe e përditshmja tjetër e Madridit “AS” që hapet me titullin “Stuhi Futbolli”, raporton “Supersport”.

Sipas kësaj gazete, El Clasico dhuroi gjithçka, tre penallti, 7 gola, një karton të kuq dhe shumë emocione. Në kampin katalanas, “E Mundo Deportivo” është në delir.

Me foton e Messit që puth fanellën e Barcelonës, kjo gazetë veçon si spektakolare paraqitjen e argjentinasit dhe mesfushorit Andres Iniesta. Edhe e përditshmja tjetër “Sport” e vë theksin te Lionel Messi, duke nënvizuar se 4 herë fituesi i Topit të Artë dhe Andres Iniesta vendosën diktatin në “Santiago Bernabeu”.

Për “L’Equipe” më shumë rëndësi ka futbollisti i kombëtares Karim Benzema. Gazeta franceze hapet me titullin Messi 3, Benzema 2, ndërsa italiania “Corriere Dello Sport” e cilëson takimin e Madridit si një leksion të vërtetë futbolli për të gjithë botën.