Macron dhe Scholz i kërkojnë Putinit të lirojë luftëtarët e Azovstal

Presidenti Emmanuel Macron dhe kancelari gjerman Olaf Scholz kanë pasur një bisedë telefonike me presidentin rus, Vladimir Putin.

Gjatë bisedës telefonike, presidenti Macron dhe kancelari Scholz i kërkuan Putinit të lirojë 2,500 mbrojtësit ukrainas të fabrikës së çelikut Azovstal të ndaluar aktualisht nga forcat e Kremlinit, tha pallati Elysee, transmeton Telegrafi.

Javën e kaluar, ushtria ruse shpalli Azovstalin dhe të gjithë Mariupolin “të çliruar plotësisht” dhe raportoi se më shumë se 2,400 luftëtar kishin dalë nga xhepi i fundit i rezistencës ukrainase në qytetin e rrethuar.

Luftëtarët që kishin nevojë për trajtim mjekësor u dërguan në një spital në qytetin e kontrolluar nga Rusia të Novoazovsk, rreth 48 kilometra në lindje të Mariupolit, derisa të tjerët u dërguan në Olenivka.

Mes tjerash, u diskutua gjithashtu edhe për eksportimin e grurit ukrainas.

Putini i tha liderëve Perëndimorë se Rusia është e gatshme të diskutojë mënyrat për t’ia bërë të mundur Ukrainës eksportimin e grurit nga portet e Detit të Zi, raportoi Reuters, duke cituar Kremlinin.

Gjatë një telefonate sot, presidenti rus i informoi ata se Kremlini ishte gati të gjente opsione për “eksportet e papenguara të grurit” dhe tha se Rusia ishte gati të rriste eksportin e plehrave dhe produkteve bujqësore nëse hiqen sanksionet e vendosura ndaj vendit. /Telegrafi/